Post News Media ព័ត៌មានជាតិ ឃើញរថយន្តជែងគ...

ឃើញរថយន្តជែងគ្នាហើយនូវជិះម៉ូតូបម្រុងជែងទៀត ទីបំផុតបុកបង្គោលភ្លើងរបួសធ្ងន់៣នាក់

ចែកចាយបន្ត

ពោធិ៍សាត់: លោក ឯម រុន អធិការនគរបាលស្រុកក្រគរ បានប្រាប់Post Newsថា មានករណីគ្រោះថ្នាក់ចរាចរណ៍មួយបានកើតឡើង បន្ទាប់ពីម៉ូតូមួយគ្រឿង បម្រុងជែងរថយន្ត២គ្រឿងដែលកំពុងជែងគ្នា ក៏បណ្តាលឲ្យជ្រុលចង្កូតទៅបុកបង្គោលភ្លើងពេញទំហឹង បណ្តាលឲ្យមនុស្ស៣នាក់របួសធ្ងន់តែម្តង។

ហេតុការណ៍នេះបានកើតឡើងកាលពីវេលាម៉ោង ៤និង៣០នាទីល្ងាច ចន្លោះគីឡូម៉ែត្រលេខ១៧៥-១៧៦ មុខផ្ទះឈ្មោះ ម៉ោ មន អាយុ៧១ ឆ្នាំ ក្នុងភូមិតាកែវលើ ឃុំត្នោតជុំ ស្រុកក្រគរ ខេត្តពោធិ៍សាត់។

តាមប្រភពព័ត៌មានបានឲ្យដឹងថា មុនពេលកើតហេតុ គេឃើញមានរថយន្ត ២ គ្រឿង មិនស្គាល់ម៉ាក បានបើកជែងគ្នា ពីកើតទៅលិច មកដល់ចំណុចកើតហេតុ ខាងលើ ក៏មានម៉ូតូ ម៉ាកFine ពណ៌សលាយក្រហម ពាក់ស្លាកលេខ ភ្នំពេញ 1X- 0287 ដោយបើកស្របទិសគ្នា និងជិះគ្នាចំនួន ៣នាក់ បម្រុងនឹងបើកជែង រថយន្ត ប៉ុន្តែបានជ្រុលចង្កូតទៅបុកបង្គោលសុវត្តិភាព ខាងជើងផ្លូវ បណ្តាលឲ្យដួលតែម្តង។

ក្នុងនោះជនរងគ្រោះទី១ឈ្មោះ ឈុំ រស់នៅភូមិថ្មីឃុំស្នាអន្សា ស្រុកក្រគរ, ទី២ឈ្មោះ វ័រ ភេទប្រុស អាយុ២៧ឆ្នាំ រស់នៅភូមិថ្មី ឃុំស្នាអន្សា ស្រុកក្រគរ និងជនរងគ្រោះទី៣ឈ្មោះ ហួង អាយុ២៥ ឆ្នាំ រស់នៅពោធិ៍សាត់ ។ អ្នកទាំង៣ ត្រូវបានបញ្ជូនទៅពេទ្យពោធិ៍សាត់ រីឯម៉ូតូរក្សាទុកនៅប៉ុស្តិ៍នគរបាលរដ្ឋបាលត្នោតជុំ៕

ចែកចាយបន្ត