Post News Media ព័ត៌មានជាតិ ទុកម៉ូតមុខបន្...

ទុកម៉ូតមុខបន្ទប់រវល់ហូបបាយមួយភ្លែត ចោរលួចបាត់!

ចែកចាយបន្ត

ភ្នំពេញ: បុរសម្នាក់បានសម្ដែងការហួសចិត្ត និងសោកស្ដាយយ៉ាងខ្លាំង ដោយសារតែម៉ូតូរបស់គាត់១គ្រឿង ដែលជាយានជំនិះដ៏សំខាន់បំផុតនិងជាមធ្យោបាយសម្រាប់រូបគាត់ក្នុងការជិះទៅធ្វើការរាល់ថ្ងៃដែលមិនអាចខ្វះបានស្របពេលដែលគាត់ហូបបាយថ្ងៃត្រង់ ចតម៉ូតូនៅមុខបន្ទប់ជួលដែលគាត់ស្នាក់នៅតែមួយសន្ទុះប៉ុណ្ណោះ ត្រូវក្រុមចោរលួចកាច់កយកទៅបាត់ស្រមោល។

ហេតុការណ៍នេះ បានកើតឡើងកាលពីវេលាម៉ោង១១ និង២០នាទីថ្ងៃទី១៩ ខែឧសភា ឆ្នាំ២០១៧ នៅចំណុចបន្ទប់ផ្ទះជួលមួយកន្លែង ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

បុរសរងគ្រោះឈ្មោះ កោះ វណ្ណសារិទ្ធ អាយុ២៤ឆ្នាំ មុខរបរកម្មកររោងចក្រ មានទីលំនៅក្នុងភូមិកងមាស ឃុំបន្ទាយអំពិល ស្រុករលាប្អៀរ ខេត្តកំពង់ឆ្នាំង និងស្នាក់នៅផ្ទះជួលនៅក្នុងភូមិកើតហេតុខាងលើ។ ចំណែកម៉ូតូដែលបាត់នោះម៉ាក ហុងដាឌ្រីម សេ១២៥ ស៊េរីឆ្នាំ២០១០ បិទតែមស៊េរីឆ្នាំ២០១៥ ពណ៌ខ្មៅ ពាក់ស្លាកលេខ កំពង់ឆ្នាំ 1C-2696 ។

បុរសរងគ្រោះបានឲ្យដឹងថា នៅមុនពេលកើតហេតុគាត់បាន ចតម៉ូតូនោះនៅមុខបន្ទប់ដែលគាត់ស្នាក់នៅ បន្ទាប់មកគាត់បានចូលហូបបាយនៅក្នុងបន្ទប់ ហើយមួយសន្ទុះប៉ុណ្ណោះក្រោយពេលហូបបាយរួចមើលម៉ូតូស្រាប់តែបាត់មិនឃើញ ទើបមានការភ្ញាក់ផ្អើលឆោឡោ ហើយបានតាមរកប៉ុន្តែមិនបាន ឃើញនោះឡើយ។លុះរកមិនឃើញទើបនៅរសៀលថ្ងៃដដែល គាត់បានមកកាន់ប៉ុស្ដិ៍នគរបាលរដ្ឋបាលចោមចៅ ដើម្បីដាក់ពាក្យបណ្ដឹងសុំឲ្យនគរបាលជួយអន្តរាគមន៍ ស្វែងរកម៉ូតូរបស់គាត់ ក្រែងលោអាចរកឃើញមកវិញ ព្រោះម៉ូតូនោះសំខាន់ខ្លាំងណាស់ សម្រាប់រូបគាត់ក្នុងការជិះប្រកបរបររកស៊ី ចិញ្ចឹមជីវិតខ្លួនឯងនិងក្រុមគ្រួសារទាំងមូល៕