Post News Media ព័ត៌មានជាតិ ស្រីស្អាតម្នា...

ស្រីស្អាតម្នាក់ ជិះម៉ូតូបត់ទទឹងផ្លូវមិនមើលត្រូវម៉ូតូលក់ធូរេនបុកពេញទំហឹង!

ចែកចាយបន្ត

កំពត: ភ្នាក់ងារPost News ប្រចាំខេត្តកំពត បានរាយការណ៍មកថា យ៉ាងហោចណាស់មាន បុរសម្នាក់បានរងរបួសធ្ងន់បាក់ជើង បន្ទាប់ពីជួបហេតុការណ៍គ្រោះថ្នាក់ចរាចរណ៍រវាងម៉ូតូនិងម៉ូតូ។

ហេតុការណ៍នេះបង្កការភ្ញាក់ផ្អើលកាលពីនៅវេលាម៉ោងប្រមាណ១០និង២០ នាទី ព្រឹកថ្ងៃទី២០ ខែឧសភា ឆ្នាំ២០១៧ នៅចំណុចមុខវត្តកំពត ស្ថិតក្នុងភូមិតាដិប សង្កាត់អណ្តូងខ្មែរ ក្រុងកំពត ខេត្តកំពត។

បើតាមនគរបាលបានឲ្យដឹងថា អ្នកដែលរងគ្រោះក្នុងហេតុការណ៍នេះ មានចំនួន២នាក់ តែបុរសខាងលើគឺរងរបួសធ្ងន់ជាងគេ ដោយទំនងជាបាក់ឆ្អឹងជើង ដើរមិនរួចដែលត្រូវបានគេស្គាល់មានឈ្មោះ ឌី ញានវិសាល ស្នាក់នៅភូមិសំរោង ឃុំជុំក្រៀល ស្រុកទឹកឈូ ខេត្តកំពត។

បើតាមការរៀបរាប់ពីអ្នក ដែលបានឃើញហេតុការណ៍ខាងលើ បានឲ្យដឹងថា នៅមុនពេលកើតហេតុ គេបានឃើញជនរងគ្រោះខាងលើជិះម៉ូតូមួយគ្រឿងម៉ាក ហុងដាសេ១២៥ ស៊េរីឆ្នាំ២០១៧ គ្មានស្លាកលេខ ដឹកផ្លែធូរេនពេញលើម៉ូតូ ជិះក្នុងទិសដៅពីលិចទៅកើត លុះមកដល់ចំណុចខាងលើ ស្រាប់តែមានម៉ូតូម៉ាកហុងដាសេ១២៥ ស៊េរីឆ្នាំ២០១៧ដូចគ្នា ពាក់ស្លាកលេខកំពត 1K-9231 បើកបរដោយនារីស្រស់ស្អាតម្នាក់ ក្នុងទិសដៅបញ្ច្រាសទិសគ្នា បានបត់ឆ្លងទទឹងផ្លូវ បណ្តាលឲ្យខាងបុរសពិបាកគ្រប់គ្រងល្បឿនក៏បុកពេញទំហឹង បណ្តាលឲ្យដួល របួសដេកលើផ្លូវតែម្តង។ ចំណែកនារីរូបស្រស់នោះ គ្រាន់តែរបួសស្នាមមុខតិចតួចប៉ុណ្ណោះ។

ក្រោយពេលកើតនគរបាលចរាចរណ៍ក្រុង សហការជាមួយកម្លាំងប៉ុស្តិ៍រដ្ឋបាល បានចុះមកត្រួតពិនិត្យ និងសម្រួលចរាចរណ៍ដោយលើកម៉ូតូទាំង២ដាក់ទៅម្ខាងដើម្បីបញ្ចៀសការកកស្ទះ និងរង់ចាំការដោះស្រាយរវាងភាគីទាំងសងខាងដើម្បីបញ្ចប់រឿងផងដែរ ចំណែកជនរងគ្រោះដែលរងរបួសធ្ងន់ ក៏ទៅសង្គ្រោះបន្ទាន់នៅមន្ទីរពេទ្យផងដែរ៕