Post News Media ព័ត៌មានជាតិ ទៀតហើយ! កម្មក...

ទៀតហើយ! កម្មការិនីរោងចក្រកាត់ដេរ ក្រុមហ៊ុនអាខាសេតហ្គាមិន បន្តដួលសន្លប់៤០នាក់ទៀត!

ចែកចាយបន្ត

ភ្នំពេញ: កម្មការិនីដែលបម្រើការងារនៅរោងចក្រកាត់ដេរសម្លៀកបំពាក់ យីហោ អាខាសេតហ្គាមិន បានបន្តដួលសន្លប់៤០នាក់ទៀត ខណ:កំពុងធ្វើការងារ។

ហេតុការណ៍នេះកើតឡើងកាលពីវេលាម៉ោង៨និង៤០ព្រឹក ថ្ងៃទី២ ខែមិថុនា ឆ្នាំ២០១៧ ដែលមានទីតាំងស្ថិតនៅក្នុង សួនឧស្សាហកម្មវឌ្ឍន:២ ភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។

តាមប្រភពព័ត៌មានបានឲ្យដឹងថា យ៉ាងហោចណាស់មានកម្មការិនីដែលបម្រើការងារនៅរោងចក្រកាត់ដេរសម្លៀកបំពាក់ យីហោ អាខាសេតហ្គាមិន បានបន្តដួលសន្លប់៤០នាក់ទៀត ខណ:កំពុងធ្វើការងារ។

ប្រភពព័ត៌មានដដែលបានឲ្យដឹងថា នៅមុនពេលកើតហេតុកម្មករកម្មការិនី ចំនួន១៧៧៧នាក់ នៅក្នុងរោងចក្រនោះ បានចូលទៅធ្វើការជាធម្មតា ហើយក្រោយមក ខណ:ពេលកំពុងតែធ្វើការសុខៗ ស្រាប់តែមានអ្នកដួលសន្លប់ ជាបន្តបន្ទាប់គ្នារដូករណែល បង្កឲ្យមានការភ្ញាក់ផ្អើលទាំងព្រឹក ហើយនៅពេលនោះត្រូវបាន គេបញ្ជូនទៅកាន់គ្លីនិកឯកជន ស្ថិតនៅក្នុងភូមិព្រៃកី សង្កាត់ភ្លើងឆេរទេះ ខណ្ឌពោធិ៍សែនជ័យ ដើម្បីសង្គ្រោះបន្ទាន់ភ្លាមៗ។ ចំណែកកម្មករកម្មការិនីដែល អត់ដួលសន្លប់បានរត់ចេញពីរោងចក្រ ក្នុងស្ថានភាពភិតភ័យ ហើយបាននាំគ្នាឡើងជិះរថយន្តត្រឡប់ទៅផ្ទះវិញរៀងៗខ្លួន ហើយរោងចក្របានបិទទ្វារជាបណ្ដោះអាសន្ន នាថ្ងៃនោះផងដែរ។ ហើយការដួលនោះសង្ស័យបណ្ដាលមកពីអារម្មណ៍ភិតភ័យ កាលពី៣ថ្ងៃមុនដែរ នៅក្នុងរោងចក្រនោះកម្មករកម្មការិនីម្នាក់ដួលស្លាប់ នៅបន្ទប់ទឹកហើយខណ:នោះ ក៏មានកម្មការិនីជិត៣០នាក់ ផ្សេងទៀតដួលសន្លប់ដែរ។

គួរបញ្ជាក់ថា កាលពីវេលាម៉ោង១២ ថ្ងៃត្រង់ ថ្ងៃទី៣១ ខែឧសភា ឆ្នាំ២០១៧ កន្លងមកនេះនៅក្នុងរោងចក្រ ខាងលើ មានកម្មការិនីម្នាក់ឈ្មោះ ខាត់ សាម៉ើ អាយុប្រហែលជាង៤០ឆ្នាំ មានទីលំនៅក្នុងភូមិរលួស ឃុំដើមឫស្ស ស្រុកកណ្ដាលស្ទឹង ខេត្តកណ្ដាល។ មានជម្ងឺលើសឈាមហើយបានដួលសន្លប់នៅបន្ទប់ទឹក នៅក្នុងរោងចក្រ បន្ទាប់មកបានស្លាប់បាត់បង់ជីវិត ក្រោយពេលបញ្ជូនទៅសង្គ្រោះ ដល់ពាក់កណ្ដាលផ្លូវ ហើយដំណឹងនោះ បានដឹងដល់កម្មករកម្មការិនីដែលកំពុងបម្រើការងារ ធ្វើឲ្យមានការភិតភ័យ ក៏បានដួលសន្លប់ជាបន្តបន្ទាប់ជិត៣០នាក់។ ពេលនោះរោងចក្របានបិទទ្វារបណ្ដោះអាសន្ន រហូតដល់ថ្ងៃទី២ ខែមិថុនានេះ ទើបចូលធ្វើការជាថ្មី ហើយបានដួលសន្លប់ជាលើកទី២ទៀតបែបនេះតែម្ដង៕