Post News Media ព័ត៌មានជាតិ រថយន្តបែនបុកម...

រថយន្តបែនបុកម៉ូតូពីក្រោយបណ្តាលឲ្យប្ដីប្រពន្ធពីរនាក់រងរបួសធ្ងន់ បង្កការភ្ញាក់ផ្អើល!

ចែកចាយបន្ត

ភ្នំពេញ: យ៉ាងហោចណាស់មានមនុស្សប្រុសស្រីពីរនាក់ប្តីប្រពន្ធបានរងរបួស ដោយបុរសជាប្តីបាក់ជើងម្ខាង និងស្ត្រីជាប្រពន្ធបែកក្បាលរងរបួសយ៉ាងធ្ងន់ធ្ងរ ខណ:ពេលដែលពួកគាត់ជិះម៉ូតូម៉ាកហុងដា C125 មួយគ្រឿងតាមផ្លូវក្នុងល្បឿនយឺតៗមកដល់ចំណុចភ្លើងស្តុបបញ្ញាសក្តិក៏ស្រាប់តែរថយន្តបែនដឹកដីធន់ធំមួយគ្រឿងបើកបរដោយខ្វះការប្រុងប្រយ័ត្នទៅបុកពីក្រោយនោះ។

ហេតុការណ៍គ្រោះថ្នាក់ចររាចរណ៍នេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី១៤ ខែមិថុនា ឆ្នាំ២០១៧ នៅចំណុចភ្លើងស្តុបពេទ្យបញ្ញាសក្តិ ផ្លូវលេខ៣៧១ កែងនិងផ្លូវលេខ២៧១ ភូមិព្រែកតាគង់ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

តាមប្រភពព័ត៌មានបានប្រាប់ឲ្យដឹងថា ពីរនាក់ប្តីប្រពន្ធរងគ្រោះមានឈ្មោះ រ៉េន ណារ៉េត អាយុ៦០ឆ្នាំជាប្តី និងទី២ឈ្មោះ ណែម ឈុនអ៊ី អាយុ៥៨ឆ្នាំជាប្រពន្ធ មានទីលំនៅអាគារប៊ូឌីញ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។ បុរសអ្នកបើកបររថយន្តបង្កមានឈ្មោះ មន ភាព អាយុ៣៣ឆ្នាំ ស្នាក់នៅផ្ទះលេខ២ ភូមិពោងពាយ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ប្រភពដដែលបានបន្តថា មុនពេលកើតហេតុជនរងគ្រោះទាំងពីរនាក់ប្តីប្រពន្ធបានជិះម៉ូតូម៉ាកហុងដា C125 ពណ៌ខ្មៅ ស៊េរីឆ្នាំ ២០១៥ ពាក់ស្លាកលេខភ្នំពេញ១FA-1822 មួយគ្រឿងមកពីមើលផ្ទះនៅចំការដូង ដើម្បីនិងរៀបចំរើផ្ទះចេញពីអគារប៊ូឌីញនៅថ្ងៃស្អែក លុះមកដល់ចំណុចខាងលើក៏ស្រាប់តែមានរថយន្តបែនដឹកដីធន់ធំមួយគ្រឿងម៉ាក ហ៊ីយ៉ន់ដាយ ពណ៌ខៀវលាយស បើកមកបុកពីក្រោយអូសជាប់ខាងក្រោមរថយន្តទាំងមនុស្សនិងម៉ូតូបណ្តាលឲ្យរងរបួសយ៉ាងធ្ងន់ធ្ងរទាំងពីរនាក់តែម្តង។

ក្រោយពេលកើតហេតុ ជនរងគ្រោះវ័យចំណាស់ទាំងពីរនាក់ប្តីប្រពន្ធត្រូវបានរថយន្តសាមុយរបស់មន្ទីរពេទ្យបញ្ញាសក្តិដែលនៅក្បែរនោះដឹកយកទៅសង្គ្រោះនៅមន្ទីរពេទ្យកាល់ម៉ែត្រ ចំណែកឯអ្នកបើកបរ រថយន្តបែនដឹកដីបង្ក និងម៉ូតូត្រូវបានបញ្ជូនយកទៅរក្សាទុកការិយាល័យចររាចរណ៍ផ្លូវគោករាជធានីភ្នំពេញ ដើម្បីរង់ចាំធ្វើការដោះស្រាយគ្នាជាបន្តទៅទៀត៕

ចែកចាយបន្ត