Post News Media ព័ត៌មានជាតិ បុរសនារី២នាក់...

បុរសនារី២នាក់ឆ្លៀតឱកាសបើកទ្វារឡាន ខណ:បុរសជនជាតិចិនម្នាក់ស្រវឹងខ្លាំងបើកទៅមុខលែងរួច!

ចែកចាយបន្ត

ភ្នំពេញ:​ បុរសនារី២នាក់ជិះម៉ូតូហុងដាឌ្រីមសេ ១២៥ មួយគ្រឿង បានធ្វើសកម្មភាព បើកទ្វាររថយន្ដ បុរសជនជាតិចិនម្នាក់ ដែលស្រវឹងជោកជាំ ហើយឈប់រថយន្ដដេកនៅចញ្ចើមផ្លូវ ពេលសមត្ថកិច្ចដែលកំពុងល្បាតតាមផ្លូវឃើញ ដេញបុរសនារីសង្ស័យព្យាយាមជិះម៉ូតូរត់ផ្អើលទីក្រុងភ្នំពេញទើបឃាត់ជាប់។

ហេតុការណ៍នេះកើតឡើងកាលពីវេលាម៉ោង២និង១០នាទីយប់ ឈានចូលថ្ងៃទី១៦ ខែមិថុនា ឆ្នាំ ២០១៧ ត្រង់ចំណុចជិតស្តុបផ្សារដើមគរ តាមបណ្ដោយផ្លូវមុនីរ៉េត សង្កាត់បឹងសាឡាង ខណ្ឌទួលគោក រាជធានីភ្នំពេញ។

យោងទៅតាមសំដីរបស់សមត្ថកិច្ចបានឲ្យដឹងថា មុនពេលកើតហេតុ រូបគាត់កំពុងតែជិះម៉ូតូល្បាត ស្រាប់តែពេលនោះគាត់បានឃើញ បុរសនារីសង្ស័យ២នាក់ ជិះម៉ូតូហុងដាឌ្រីមសេ ១២៥ មួយគ្រឿង ពណ៌ខ្មៅ ខណ:បុរសនារីសង្ស័យខាងលើ បានធ្វើសកម្មភាពបើកទ្វាររថយន្ដមួយគ្រឿង ដែលជិះដោយបុរសជនជាតិចិនម្នាក់ ដែលស្រវឹងជោកជាំ ហើយឈប់រថយន្ដដេកនៅចញ្ចើមផ្លូវធ្វើមិនខ្វល់ ខណ:ពេលនោះគាត់បានស្រែកទៅ បុរសនារីសង្ស័យខាងលើ ឲ្យឈប់ តែបុរសនារីសង្ស័យនេះមិនបានឈប់ម៉ូតូទេ ហើយបានព្យាយាមបើកម៉ូតូរត់គេច រហូតសឹងតែមួយក្រុងភ្នំពេញ រហូតទៅដល់វិទ្យាល័យទួលគោក ក៏ត្រូវសមត្ថកិច្ចឃាត់ជាប់ យកមកកន្លែងកើតហេតុវិញ។ នៅពេលមកដល់កន្លែងកើតហេតុវិញ ក៏មានប្រពន្ធរបស់ជនជាតិចិនស្រវឹងខាងលើ បានមកដល់ចំណុចកើតហេតុ បានរកអីវ៉ាន់ហើយក៏បានប្រាប់ថា ប្ដីរបស់គាត់ បាត់ទូរស័ព្ទ smart phone មួយគ្រឿង តែគាត់មិនដាក់ពាក្យបណ្ដឹងទេ ហើយគាត់ក៏យកប្ដីរបស់គាត់ឡើងលើរថយន្ដឡុចស៊ីស ៤៧០ ជិះត្រលប់ទៅផ្ទះ រួចទុករថយន្ដតាគូម៉ារបស់ប្ដីគាត់ នៅកន្លែងកើតហេតុ។

ក្រោយកើតហេតុ សមត្ថកិច្ចបានឃាត់ខ្លួនបុរសនិងនារីសង្ស័យខាងលើ យកទៅប៉ុស្តិ៍នគរបាលរដ្ឋបាលបឹងសាឡាង ដើម្បីស្រាវជ្រាវសាកសួរ៕

ចែកចាយបន្ត