Post News Media ព័ត៌មានជាតិ សង្សារខ្ចីម៉ូ...

សង្សារខ្ចីម៉ូតូតែ១ថ្ងៃទៅបាត់១ខែមិនឃើញយកមកសងវិញ ទើបដាច់ចិត្តប្តឹងសមត្ថកិច្ច!

ចែកចាយបន្ត

ភ្នំពេញ: យុវជនម្នាក់ត្រូវបានសង្សារខ្ចីម៉ូតូជិះតែមួយថ្ងៃទៅបាត់រហូតមួយខែមិនឃើញត្រឡប់មកវិញក៏ធ្វើដំណើរទៅកាន់ប៉ុស្តិ៍នគរបាលចោមចៅដើម្បីដាក់ពាក្យបណ្តឹង។

ជនរងគ្រោះឈ្មោះ បូ សុផារ៉ាន់ អាយុ១៧ឆ្នាំ មុខរបរ អ្នកលក់ទឹកសុទ្ធ ស្នាក់នៅ ភូមិទួលពង្រសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មានស្រុកកំណើតនៅ ភូមិបព្រៃ ឃុំបព្រៃ ស្រុកស៊ីធរកណ្តាល ខេត្តព្រៃវែង។ នារីដែលជាសង្សារខ្ចីម៉ូតូជិះទៅនោះឈ្មោះ ស្កាក់ គុណ អាយុជាង២០ឆ្នាំ ស្នាក់នៅ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។ ចំណែកម៉ូតូដែលនាងខ្ចីនោះម៉ាក ឌ្រីមស១២៥ ស៊េរីឆ្នាំ២០០៨ ពណ៌ខ្មៅ ពាក់ស្លាកលេខ ភ្នំពេញ 1AE-0017។

ប្រភពពីជនរងគ្រោះបានឱ្យដឹងថា នៅមុនពេលកើតហេតុប្រហែល១ខែមុន នាងខ្ចីម៉ូតូជិះដោយប្រាប់ប្អូនថា យកទៅឌុបមិត្តភ័ក្រជូនទៅសមាគមន៍តែមួយថ្ងៃទេ ហើយស្រាប់តែទៅបាត់រហូតតែម្តង ហើយពេលប្អូនទៅសួរដល់ផ្ទះនាង តែម្តាយចិញ្ចឹមនាងប្រាប់ថា មិនឃើញនាងមកផ្ទះ៤យប់ហើយ។ ប្រភពព័ត៌មានពីឪពុកជនរងគ្រោះបានឱ្យដឹងថា បានជាទើបតែមកដាក់ពាក្យបណ្តឹងនៅពេលនេះ ព្រោះគាត់គិតថាក្រែងលោនាងយកម៉ូតូមកឱ្យកូនគាត់វិញ តែចាំបាត់ៗទើបរូបគាត់ជូនកូនមកដាក់ពាក្យបណ្តឹងនៅប៉ុស្តិ៍នគរបាលចោមចៅ នៅរសៀលថ្ងៃទី១៧ ខែមិថុនា ឆ្នាំ២០១៧ នេះតែម្តង ដើម្បីឱ្យសមត្ថកិច្ចជួយចំណាំភិនភាគម៉ូតូនិងជនល្មើស៕

ចែកចាយបន្ត