Post News Media ព័ត៌មានជាតិ បាត់ខ្លួន២ថ្ង...

បាត់ខ្លួន២ថ្ងៃប្រទះឃើញសពអណ្ដែតទឹក បង្កការភ្ញាក់ផ្អើលដល់សាច់ញាតិនិងសមត្ថកិច្ច!

ចែកចាយបន្ត

ព្រះវិហារ: លោកអធិការស្រុកគូលេន បានប្រាប់Post Newsថា មានករណីប្រទះឃើញសាកសពស្ត្រីម្នាក់អណ្ដែតទឹកនៅក្នុងស្ទឹង។

ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង២និង១៥នាទី ថ្ងៃទី១៦ ខែមិថុនា ឆ្នាំ២០១៧ ត្រង់ចំណុចស្ទឹងដាច់ក្រោមផ្លូវឆ្លង ភូមិឈូក ឃុំភ្នំត្បែងពីរ ស្រុកគូលេន ខេត្តព្រះវិហារ។

ជនរងគ្រោះមានឈ្មោះ ផៃ ផូ ភេទស្រី អាយុ៤៧ឆ្នាំ មុខរបរកសិករ រស់នៅភូមិឈូក ឃុំភ្នំត្បែងពីរ ស្រុកគូលេន ខេត្តព្រះវិហារ។

តាមប្រភពព័ត៌មានពីឈ្មោះ ផៃ ផន ត្រូវជាបងស្រីជនរងគ្រោះបានរៀបរាប់ថា កាលពីថ្ងៃទី១៤ ខែមិថុនា ឆ្នាំ២០១៧ វេលាម៉ោងប្រហែល៦ល្ងាចជនរងគ្រោះបានធ្វើដំណើរចេញពីភូមិឈូកឆ្ពោះទៅកាន់ស្រែកោះឪឡឹកចម្ងាយពីកន្លែងកើតហេតុប្រមាណ២០០ម៉ែត្រ។ ពេលចេញទៅបងប្អូនបានហាមថា កុំទៅអីជិតយប់ហើយ ម្យ៉ាងកំពុងស្រវឹងផង តែជនរងគ្រោះថាត្រូវតែទៅ ព្រោះប្ដីដេកចាំនៅឯស្រែខ្លាចប្ដីខឹង។ គ្រួសារនេះគឺដេកនៅស្រែកោះឪឡឹកទាំងប្រាំងទាំងវស្សា។

ក្រោយពីទទួលបានសេចក្ដីរាយការណ៍នោះ សមត្ថកិច្ចប៉ុសិ៍បានចុះទៅដល់កន្លែងកើតហេតុ ឃើញមានដានជើងជនរងគ្រោះរអិលធ្លាក់ទៅក្នុងអន្លង់ជ្រៅក្រោមផ្លូវឆ្លង ទឹកហូរគួចវិលនិងមានជម្រៅ២.៥ម៉ែត្រ ហើយឃើញបង្វិចក្រមាធ្លាក់នៅមាត់ច្រាំង ក្នុងបង្វិចនោះមាន ថ្មពិល២ដុំ ស្ករសិកញ្ចប់តូច និងស្រាស១ដបកន្លះលីត្រ។

ប្រភភពដដែលបានបន្តថា សាកសពគឺអណ្ដែតលើទឹកនៅជាប់នឹងសំរាស់ឫស្សី ត្រូវបានក្រុមគ្រួសារលើកស្រង់ចេញពីទឹកដាក់លើគោយន្ត ហើយមានសភាពហើមស្អុយខុសពីធម្មតា។

តាមការសន្និដ្ឋានរបស់គណកម្មការពិនិត្យបានបញ្ជាក់ថា ជនរងគ្រោះបានដើរឆ្លងស្ទឹងក្នុងសភាពស្រវឹង រអិលជើងធ្លាក់ចូលក្នុងអន្លង់ទឹកជ្រៅ គ្រប់គ្រង់ខ្លួនឯងពុំបាន បណ្ដាលឲ្យលង់ស្លាប់តែម្តង ហើយសាកសពត្រូវបានសាច់ញាតិក្រុមគ្រួសារយកទៅធ្វើបុណ្យតាមប្រពៃណី៕

ចែកចាយបន្ត