កណ្តាលៈ សមត្ថកិច្ចឃាត់ខ្លួនជនសង្ស័យ២នាក់ ពាក់ពន្ធ័ករណីជួញដូរ និងប្រើប្រាស់ដោយខុសច្បាប់នូវសារធាតុញៀន។
កើតហេតុនៅវេលាម៉ោង១ និង២០នាទីរសៀល ថ្ងៃទី១៨ ខែមិថុនា ឆ្នាំ២០១៧ នៅចំណុចផ្សារកំពង់កុង ភូមិកំពង់កុង ឃុំកំពង់កុង ស្រុកកោះធំ ខេត្តកណ្តាល។
ជនសង្ស័យទាំង២នាក់ ទី១-ឈ្មោះ ស្រ៊ឺ ប៉ូឡូញ ភេទប្រុស អាយុ១៩ឆ្នាំ មានទីលំនៅភូមិ ព្រែកផ្អាវ ឃុំកំពង់កុង ស្រុកកោះធំ ខេត្តកណ្តាល មុខរបរ កសិករ និងទី២-ឈ្មោះ លាង ពៅ ហៅលាម ភេទប្រុស អាយុ ២២ឆ្នាំ មានទីលំនៅភូមិ ក្បាលដំរីក្រោម ឃុំកំពង់កុង ស្រុកកោះធំ ខេត្ត កណ្តាល មុខរបរ ចុងភៅការ ។ វត្ថុតាងចាប់យករួមមាន៖ ក្រាមពណ៌សថ្លាសង្ស័យសារធាតុញៀន ម៉ាទឹកកកIce ចំនួន៨កញ្ចប់តូច,ទូរសព្ទចល័តចំនួន៣ គ្រឿង(ម៉ាក IPhone6 plusចំនួន១, IPhone5ចំនួន១, អិនចុចពិលចំនួន១)។

មុនឈានដល់ការចាប់ឃាត់ជនសង្ស័យខាងលើ កម្លាំងសមត្តកិច្ចប៉ុស្តិ៍នគរបាលរដ្ឋបាលកំពង់កុង បានសហការជាមួយកម្លាំងជំនាញនៃអធិការដ្ឋាននគរបាលស្រុកកោះធំ បានចុះបង្រ្កាបមុខសញ្ញាជួញដូរ និងប្រើប្រាស់គ្រឿងញៀន នៅចំនុចផ្សារកំពង់កុង ស្ថិតនៅភូមិ កំពង់កុង ឃុំកំពង់កុង ស្រុកកោះធំ ខេត្តកណ្តាល។ ដែលជនសង្ស័យខាងលើ កំពុងតែឈរលើស្ពានព្រែកកន្ធរតាម បណ្តោយផ្លូវជាតិលេខ១១០ ក្រោយមកសមត្ថកិច្ចនគរបាលក៏បានធ្វើការ ឃាត់ជនសង្ស័យ និងត្រួតពិនិត្យឆែកឆេររកឃើញមានថ្នាំញៀនចំនួន៣កញ្ចប់តូច ដែលជនសង្ស័យដាក់ទុកក្នុងហោប៉ៅរបស់ខ្លួន ក្រោយពីការត្រួតពិនិត្យចប់ ជនសង្ស័យបានសារភាពថាខ្លួនបានលាក់ទុកថ្នាំញៀនមួយចំនួនទៀតនៅក្នុងបន្ទប់ដេករបស់ខ្លួន ហើយសមត្ថកិច្ចក៏បាននាំជនសង្ស័យដើម្បីទៅបង្ហាញ និង យកថ្នាំញៀនដែលគេបានលាក់ទុកនៅក្នុងបន្ទប់ដេករបស់គេ ក្រោយមកសមត្ថកិច្ចជំនាញក៏បានឆែកឆេររកឃើញមានថ្នាំញៀនចំនួន៥កញ្ចប់តូចបន្ថែមទៀត នៅក្នុងបន្ទប់ដេករបស់ជនសង្ស័យ។

តាមចម្លើយសារភាពរបស់ ស៊្រឺ ប៉ូឡូញ បានឆ្លើយថា ខ្លួនតែងតែលក់គ្រឿងញៀន អោយទៅ ឈ្មោះ លាង ពៅ ហៅ លាម ជារឿយៗ ហើយថ្នាំញៀនខាងលើនេះ ក៏ឈ្មោះ លាង ពៅ ទើបតែទូរសព្ទមកសុំទិញដែរ ។
ក្រោយមកសមត្ថកិច្ចក៏បាននាំខ្លួនជនសង្ស័យ ឈ្មោះ លាង ពៅ ហៅ លាម និង ឈ្មោះ ស្រ៊ឺ បូឡូញ មកកាន់អធិការដ្ឋាននគរបាលស្រុកកោះធំ ដើម្បីចាត់ការតាមនីតិវិធីច្បាប់។

នៅចំពោះមុខសមត្ថកិច្ច ជនសង្ស័យ ស្រ៊ឺ បូឡូញ បានសារភាពថា ថ្នាំញៀនចំនួន៨កញ្ចប់តូច ខាងលើនេះគឺពិតជារបស់ខ្លួនបានទិញយកមកទុកលក់ និងចែកចាយបន្តប្រាកដមែន ចំណែកឯ ជនសង្ស័យ លាង ពៅ ហៅលាម បានសារភាពថាខ្លួនពិតជាបានទិញថ្នាំញៀន ពីឈ្មោះ ស្រ៊ឺ បូឡូញ ពិតប្រាកដមែន៕