Post News Media ព័ត៌មានជាតិ ប្រជាពលរដ្ឋ៥០...

ប្រជាពលរដ្ឋ៥០គ្រួសារ បានប្តឹងម្ចាស់ទីតាំងសិប្បកម្មដេញមាស និងប្រាក់ដោយចោទប្រកាន់ថា ប៉ះពាល់ដល់សុខភាព

ចែកចាយបន្ត

ភ្នំពេញ: ប្រជាពលរដ្ឋប្រមាណជា ៥០គ្រួសារ ដែលមានទីលំនៅនៅភូមិខ(២) សង្កាត់ច្រាំងចំរេះ២ ខណ្ឌឫស្សីកែវ កាលពីពេលថ្មីៗនេះ បាននាំគ្នាផ្តិតមេដៃប្តឹងទៅអាជ្ញាធរសង្កាត់ខណ្ឌជាប្រយោជន៍ ដើម្បីឲ្យជួយអន្តរាគមន៍ជូនពួកគាត់ ចំពោះទីតាំងសិប្បកម្មដេញមាសប្រាក់ ពីសំណល់មាសប្រាក់ មួយកន្លែង ដោយចោទប្រកាន់ថា ទីតាំងខាងលើនេះ មានដាក់ជាតិអាស៊ីត ប៉ះពាល់ដល់សុខភាពកូនចៅ ជាពិសេសស្ត្រីមានផ្ទៃពោះ ដោយសារតែជាតិអាស៊ីតជះក្លិនសាយភាយប៉ះពាល់យ៉ាងធ្ងន់ធ្ងរ។

ប្រជាពលរដ្ឋខាងលើបានឲ្យដឹងថា កន្លងមកពួកគាត់ធ្លាប់បានប្តឹងទៅអាជ្ញាធរសង្កាត់ ហើយអាជ្ញាធរក៏ធ្លាប់បានហៅម្ចាស់អាជីវកម្មខាងលើមកដោះស្រាយចំនួន ២លើកមកហើយ ដោយម្ចាស់អាជីវកម្មខាងលើ បានចុះកិច្ចសន្យាត្រូវរ៉ូវគ្នាជាមួយប្រជាពលរដ្ឋរួចហើយ ប៉ុន្តែជាលទ្ធផលម្ចាស់ទីតាំងនៅតែមិនគោរពតាមអាជ្ញាធរបានណែនាំឡើយ ពោលគឺនៅតែជះក្លិនអាស៊ីតពិបាកទ្រាំដដែល។ ដូចច្នេះហើយ ទើបពួកគាត់យកស្នាមមេដៃ និងពាក្យបណ្តឹងទៅដាក់នៅសាលាខណ្ឌបន្តទៀត។

ប្រជាពលរដ្ឋខាងលើបានឲ្យដឹងបន្តថា សិប្បកម្មទាំងនោះ គឺបានកើតឡើងច្រើនឆ្នាំមកហើយ ពួកគាត់ទ្រាំរស់នៅយ៉ាងវេទនាបំផុត។

លោក ឡោះ រ៉ះសេត ជាបងប្អូនខ្មែរឥស្លាមបានឲ្យដឹងថា ប្រជាពលរដ្ឋមួយចំនួនតូចដែលប្តឹងគាត់ ធ្លាប់បានយកដុំថ្មគប់មកលើផ្ទះគាត់ ហើយថែមទាំងគម្រាមដល់ក្រុមគ្រួសារគាត់ផង ប្រសិនបើនៅធ្វើអាជីវកម្មនេះទៀត។ គាត់ឆ្ងល់ណាស់ថា តើទីតាំងរបស់គាត់ខុសអ្វីខ្លះ ទើបប្រជាពលរដ្ឋមួយចំនួនតូចនៅក្បែរនោះ បែរជាមិនចង់ឲ្យគាត់ធ្វើអាជីវកម្មទៅវិញ ។

ម្ចាស់សិប្បកម្មបន្តថា ប្រជាពលរដ្ឋដែលប្តឹងទីតាំងរបស់គាត់មិនត្រឹមត្រូវឡើយ ព្រោះទីតាំងសិប្បកម្មរបស់គាត់បានគោរពទៅតាមច្បាប់ មានលិខិតចេញពីមន្ទីរឧស្សាហកម្ម និងសិប្បកម្មរាជធានីភ្នំពេញ និងច្បាប់ផ្សេងៗទៀត។

លោកបានបញ្ជាក់ថា ការដុតចំរាញ់នេះ មិនមែនប្រើអាស៊ីតដូចការលើកឡើងរបស់ប្រជាពលរដ្ឋឡើយ គឺគាត់ដុតដោយប្រើធ្យូង ហើយចំហាយផ្សែងទាំងនោះមិនមែនជះភាយទៅដល់លំនៅដ្ឋាននោះទេ និងគ្មានក្លិនអ្វីប៉ះពាល់នោះឡើយ គឺរៀបចំអាងស្តុកពេលដែលផ្សែងហ៊ុយ គឺចូលទៅទីតាំងស្តុកដ៏ធំដែលមានទឹកត្រជាក់ រួចបំលែងចូលទៅបំពង់ផ្សែងដែលមានទឹកក្តៅ ហើយចំរាញ់ឲ្យវារលាយអស់។

លោកបានបន្តថា សិប្បកម្មកែច្នៃកម្ទេចមាស និងប្រាក់នេះ គាត់បានរៀបចំប្រព័ន្ធ និងបំពង់ត្រឹមត្រូវ ដោយមានទាំងមន្ត្រីជំនាញចុះមកពិនិត្យ តែប្រជាជនមួយចំនួន មិនចង់ឲ្យគាត់ធ្វើអាជីវកម្មតែម្តង ដោយគោលបំណងរបស់ពួកគាត់ចង់ឲ្យទីតាំងនេះរលាយ។

ម្ចាស់អាជីវកម្មបន្តទៀតថា កម្ទេចកម្ទីដែលប្រមូលយកមកដុតក្រឡតូចៗនេះ មិនមែនប្រើអាស៊ីតដូចការលើកឡើងរបស់ប្រជាពលរដ្ឋនោះទេ ដោយទីតាំងគាត់បានរៀបចំមានលក្ខណ:ស្តង់ដាត្រឹមត្រូវ៕

ចែកចាយបន្ត