Post News Media ព័ត៌មានជាតិ កម្មករសំណង់បុ...

កម្មករសំណង់បុរី ឌឹកមេគង្គ រ៉ូយ៉ាល់ ចំនួន៣នាក់ត្រូវសមត្ថកិច្ចឃាត់ខ្លួនពាក់ព័ន្ធនឹងករណីគ្រឿងញៀន!

ចែកចាយបន្ត

ភ្នំពេញ: នគរបាលអន្តរាគមន៍ខណ្ឌជ្រោយចង្វារ បានធ្វើការឃារត់ខ្លួនកម្មករសំណង់ធ្វើការក្នុងបុរីឌឹកមេគង្គរ៉ូយ៉ាល់ចំនួន ៣នាក់ពាក់ព័ន្ធករណីគ្រឿងញៀន។

ប្រតិបត្តិការនេះបានធ្វើឡើងនៅវេលាម៉ោង១១និង៣០នាទីព្រឹក ថ្ងៃទី២៣ ខែមិថុនា ឆ្នាំ២០១៧ ត្រង់ចំណុចក្នុងការដ្ឋានសំណង់បុរី ឌឹកមេគង្គរ៉ូយ៉ាល់ ស្ថិតក្នុងភូមិខ្ងរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។

ប្រភពព័ត៌មានបានឲ្យដឹងថា ជនសង្ស័យដែលសមត្ថកិច្ចឃាត់ខ្លួននោះ ទី១ឈ្មោះ រី ចំរើន ភេទប្រុស អាយុ៣៤ឆ្នាំ មុខរបរ កម្មករសំណង់ ទី២ឈ្មោះ ធឿន ស្នា ភេទប្រុស អាយុ៣០ឆ្នាំ មុខរបរ កម្មករសំណង់ និងទី៣ឈ្មោះ អុល សុជីអូ ភេទប្រុស អាយុ២០ឆ្នាំ មុខរបរកម្មករសំណង់ បច្ចុប្បន្នជនសង្ស័យទាំង ៣នាក់ស្នាក់នៅក្នុងការដ្ឋានសំណង់បុរីឌឹកមេគង្គរ៉ូយ៉ាល់ ស្ថិតក្នុងភូមិខ្ងរ សង្កាត់ព្រែកលៀប ខណ្ឌជ្រោយចង្វារ។

សមត្ថកិច្ចបានប្រាប់ឲ្យដឹងថា នៅមុនពេលឃាត់ខ្លួនជនសង្ស័យខាងលើ សមត្ថកិច្ចយើងបានធ្វើការស្រាវជ្រាវរហូតឈានដល់ការចុះបង្ក្រាបជាក់ស្តែង និងបានដកហូតម្សៅក្រាមពណ៌សថ្លា១កញ្ចប់ (ជាប្រភេទម៉ាទឹកកក) និងឧបករណ៍ប្រើប្រាស់គ្រឿងញៀនមួយចំនួន។ ក្រោយពីធ្វើការឃាត់ខ្លួនជនសង្ស័យទាំង៣នាក់ខាងលើរួចមក សមត្ថកិច្ចយើងបាននាំខ្លួនទៅអធិការខណ្ឌ ដើម្បីធ្វើការសាកសួរ។

បច្ចុប្បន្នជនសង្ស័យទាំង៣នាក់ខាងលើរួមទាំងវត្ថុតាង ត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វារ ដើម្បីកសាងសំណុំរឿងចាត់ការបន្តតាមផ្លូវច្បាប់៕