Post News Media ព័ត៌មានជាតិ ផ្គើនណាស់&#82...

ផ្គើនណាស់…! ចោរគាស់ផ្ទះ៤ថ្ងៃជាប់គ្នាក្នុងក្រុងតាខ្មៅ!!!

ចែកចាយបន្ត

កណ្តាល: មួយរយ:នេះ ហាក់បីដូចជាកក្រើកណាស់ នៅក្នុងទឹកដីក្រុងតាខ្មៅ ដែលមានក្រុមចោរដើរគាស់ផ្ទះប្រជាពលរដ្ឋ៤ថ្ងៃផ្ទួនៗគ្នា ធ្វើឲ្យប្រជាពលរដ្ឋមានការភិតភយ័ និងជាពិសេសធ្វើឲ្យសមត្ថកិច្ចវិលមុខ ក្នុងការតាមប្រមាញ់ក្រុមចោរគាស់ផ្ទះទាំងអស់នោះ។ ជាពិសេសគឺនៅព្រឹកថ្ងៃទី២៩ ខែមិថុនា ឆ្នាំ២០១៧នៅចំណុចផ្ទះ លក់គ្រឿងលម្អផ្ទះគ្រប់ប្រភេទ នៅក្នុងផ្សារតាខ្មៅចាស់ ភូមិតាខ្មៅ១ សង្កាត់តាខ្មៅ ក្រុងតាខ្មៅ។

ក្នុងនោះដែរម្ចាស់ផ្ទះដែលត្រូវចោរគាស់លួចយកទ្រព្យសម្បត្តិខាងលើនេះមានឈ្មោះ អៀង ហូរ ភេទស្រី អាយុ៣៨ឆ្នាំ ស្នាក់នៅភូមិតាខ្មៅ២ សង្កាត់តាខ្មៅ ក្រុងតាខ្មៅ ។

បើតាមម្ចាស់ផ្ទះបានប្រាប់ភ្នាក់ងារ Post Newsថា ជារៀងរាល់ថ្ងៃពេលល្ងាចគាត់បិទទ្វារផ្ទះរបស់គាត់ រួចហើយគាត់ចាក់សោនៅខាងលើមួយ ខាងក្រោមមួយ ហើយគាត់ក៏ចេញទៅផ្ទះមួយទៀត នៅជិតក្បែរវិទ្យាលយ័សេរីភាព ដែលជាផ្ទះរបស់គាត់ស្នាក់នៅជាប្រចាំ ។ លុះដល់ព្រឹកថ្ងៃទី២៩ ខែមិថុនា ឆ្នាំ២០១៧ អ្នកលក់ក្បែរគាត់នៅក្នុងផ្សារតាខ្មៅចាស់នោះ បានទូរសព្ទសួរគាត់ថា ម៉េចក៏ផ្ទះបងឯងបើកទ្វារចោលចឹង គាត់ឭភ្លាមគាត់និងកូនរបស់គាត់ បានមកមើលផ្ទះរបស់គាត់ដែលបើកលក់គ្រឿងលម្អផ្ទះជារៀងរាល់ថ្ងៃនោះ ស្រាប់តែចំហរទ្វារសោដែលគាត់ចាក់នោះជ្រុះដាច់ចេញពីគ្នាទាំងអស់ហើយក្នុងផ្ទះរបស់គាត់មានដានជើងមនុស្សចូល ជាន់ និងរើកកាយយក លុយ យកអាយផេត និងសម្ភារ:លម្អផ្ទះរបស់គាត់មួយចំនួន ក៏មានការឆោឡោនិងប្រញាប់ទូរសព្ទទៅប្រាប់នគរបាលក្រុងតាខ្មៅ មកដល់ទីតាំងនេះភ្លាម ។ ក្រោយមកនគរបាលក្រុងតាខ្មៅ បានមកដល់កន្លែងកើតហេតុពិនិត្យរួចមកឃើញថា ចោរបានធ្វើសកម្មភាពចាក់ទឹកអាស៊ីតផ្តាច់សោចូលលួចតែម្តង។

ប្រជាពលរដ្ឋនិងក្រុមអាជីវករ បានសំណូមពរទៅដល់លោក អ៊ាវ ចំរើន ស្នងការនគរបាលខេត្តកណ្តាល និងលោក ស៊ឹម ប៊ុតបណ្ឌឹត អធិការក្រុងតាខ្មៅ ឲ្យតាមចាប់ក្រុមចោរគាស់ផ្ទះទាំងនោះមកផ្តន្ទាទោសផង ពួកគាត់រស់នៅ និងប្រកបមុខរបរមានការភិតភយ័ខ្លាំងណាស់ ៕