Post News Media ព័ត៌មានជាតិ ស្ត្រីជនជាតិ ...

ស្ត្រីជនជាតិ ម៉ូដាវី ម្នាក់ ត្រូវបានតុលាការកាត់ទោស រឿងនាំស្ត្រីមកលក់នៅកម្ពុជា

ចែកចាយបន្ត

ភ្នំពេញ: លោក ស្វាយ តុញ ប្រធានក្រុមប្រឹក្សាចៅក្រមនៃសាលាដំបូងរាជធានីភ្នំពេញ នៅព្រឹកថ្ងៃទី៦ ខែកក្កដា ឆ្នាំ២០១៧ បានបើកសវនាការកាត់ទោសស្ត្រីជនជាតិ មុលដាវី ម្នាក់ពាក់ព័ន្ធករណីនាំមនុស្សមកលក់នៅ ប្រទេសកម្ពុជា។

លោក ស៊ិន វិរ: តំណាងអយ្យការបានចោទប្រកាន់ ជនជាប់ចោទឈ្មោះ BEJENARI LIUDMILA ហៅ LIDA ភេទស្រី អាយុ២៦ឆ្នាំ ជនជាតិ មុលដាវី ពីបទ នាំយកចេញដោយមិនស្របច្បាប់ដោយមានគោលដៅ ប្រព្រឹត្តកាលពីអំឡុងខែសីហា ឆ្នាំ២០១៤ នៅប្រទេស មុលដាវី និងចំណុចហាងឈ្មោះ កាដូ ផ្ទះលេខ១១០E0 ផ្លូវលេខ១៣៦ សង្កាត់ផ្សារកណ្តាលទី២ ខណ្ឌដូនពេញ រាជធានីភ្នំពេញ យោងតាមមាត្រាទី១០ នៃច្បាប់ស្តីពីការបង្ក្រាបអំពើជួញដូរមនុស្សនិងអំពើធ្វើអាជីវកម្មផ្លូវភេទ។

នៅក្នុងសវនាការ ជនជាប់ចោទបានឆ្លើយថា ខ្លួនបានមករស់នៅប្រទេសកម្ពុជា អំឡុងខែសីហា ឆ្នាំ២០១២ ដើម្បីធ្វើការនៅក្នុងហាងលក់ស្រាមួយ ដោយមានតួនាទីជាអ្នកគ្រប់គ្រងហាង។ ជនជាប់ចោទអះអាងថា ក្រោយមកជនរងគ្រោះ ឈ្មោះ គ្រីស្ទីណា ហៅ ស៊ូ បានសុំនាងមកធ្វើការជាមួយនៅកម្ពុជាដែរ ដោយមានកិច្ចសន្យាការងារត្រឹមត្រូវ។ ជនជាប់ចោទថា ឈ្មោះ ស៊ូ បានរត់ការធ្វើលិខិតឆ្លងដែន និងទិញសំបុត្រយន្តហោះមកកម្ពុជាដោយខ្លួនជាអ្នកចេញលុយទាំងស្រុង។ នៅពេល ឈ្មោះ ស៊ូ មកធ្វើការជាមួយខ្លួន ឈ្មោះ ស៊ូ ត្រូវធ្វើការសាកល្បង៣ខែ ដោយគ្មានប្រាក់ខែ ហូបចុក ស្នាក់នៅក្នុងហាងដោយឥតគិតថ្លៃ បន្ទាប់មកឈ្មោះ ស៊ូ ត្រូវធ្វើការ ៩ខែបន្ថែមទៀត ដោយទទួលបានប្រាក់ខែ ២៥០ដុល្លារក្នុងមួយខែ ដើម្បីសងខ្លួនថ្លៃធ្វើដំណើរ និងចំណាយមកកម្ពុជា។ ប៉ុន្តែដោយសារតែ ឈ្មោះ ស៊ូ ធ្វើការមិនទាន់គ្រប់ខែតាមកិច្ចសន្យាផង បែរជាមកប្តឹងខ្លួនដាក់គុកទៅវិញ។

ជនជាប់ចោទបញ្ជាក់ថា ខ្លួនមិនបានអូសទាញឲ្យជនរងគ្រោះមកធ្វើការនៅកម្ពុជា ឬបង្ខំឲ្យឈ្មោះ ស៊ូ ទៅដេកជាមួយភ្ញៀវនោះទេ។

យោងតាមអំណានចម្លើយជនរងគ្រោះ ឈ្មោះ ស៊ូ បានឲ្យដឹងថា ខ្លួនបានមកធ្វើការនៅកម្ពុជាជាមួយ ជនជាប់ចោទ នៅហាងលក់ស្រាអ៊ីតាលីនិងភីហ្សា ឈ្មោះ កាដូ មានថៅកែជាជនជាតិ ស្បែកខ្មៅ ឈ្មោះ EMEKWOO JEFFERY នៅអំឡុងចុងឆ្នាំ២០១៤។ ជនរងគ្រោះទទួលស្គាល់ថា ជនជាប់ចោទពិតជាបានចេញលុយទាំងអស់ សម្រាប់ការចំណាយដើម្បីមកកម្ពុជា។ នៅពេលមកដល់កម្ពុជា ជនជាប់ចោទបានដកយក លិខិតឆ្លងដែនរបស់ខ្លួនទុក និងបានបង្ខំឲ្យនាងដេកជាមួយភ្ញៀវដើម្បីយកលុយឲ្យគេ។ ក្រៅពីដេកជាមួយភ្ញៀវ នាងត្រូវបានថៅកែហាង ឈ្មោះ Jake Fried បង្ខំឲ្យដេកជាមួយ និងថតវីដេអូ ទុកគំរាមនាងថែមទៀតផង។ ជនរងគ្រោះបានប្តឹងទាមទារសំណងជំងឺចិត្តចំនួន២ម៉ឺនដុល្លារ។

ទោះជាយ៉ាងណា តុលាការបានលើកពេលប្រកាសសាលក្រមសំណុំរឿងនេះទៅព្រឹកថ្ងៃទី២ ខែសីហា ឆ្នាំ២០១៧ខាងមុខ៕