Post News Media ព័ត៌មានជាតិ ចោរ១ក្រុមលួចរ...

ចោរ១ក្រុមលួចរថយន្តសាំយ៉ុងបាត់៣ថ្ងៃ ម្ចាស់ស្នើសុំសមត្ថកិច្ចជួយអន្តរាគមន៍

ចែកចាយបន្ត

ភ្នំពេញ: បុរសម្នាក់ ត្រូវបានចោរ១ក្រុមធ្វើសកម្មភាពលួចយករថយន្ត១គ្រឿង ដែលគាត់បានចតទុកនៅមុខផ្ទះ ហើយបន្ទាប់ពីបាត់ភ្លាមគាត់បានទៅដាក់ពាក្យបណ្ដឹង សុំការអន្តរាគមន៍ពីនគរបាលប៉ុស្ដិ៍ភ្លាមៗដែរ។ ប៉ុន្តែខណ: នោះគាត់បានសង្កេតឃើញថា នគរបាលហាក់មានភាពព្រងើយកន្តើយដូចជាមិនសូវ ចង់ជួយស្វែងរកពួនស្ទាក់ចោរទាល់តែសោះ។

គិតរហូតមកទល់និងពេលនេះ រថយម្តពួកគាត់ត្រូវបានចោរ លួចយកទៅអស់រយ:ពេល៣ថ្ងៃកន្លងមកហើយ នៅតែគ្មានដំណឹងដដែលទើបពេលនេះពួកគាត់ចង់ ស្នើសុំឲ្យសមត្ថកិច្ចនគរបាលជួយអន្តរាគមន៍ជួយស្រាវជ្រាវរករថយន្តរបស់គាត់ដែលត្រូវចោរលួចនេះផង។

បុរសជាម្ចាស់រថយន្តខាងលើនោះ បានប្រាប់ឲ្យដឹថាគាត់មានឈ្មោះ សុខ សែត អាយុ៣០ឆ្នាំ ស្នាក់នៅ ក្នុងបុរី លឹម ឈាងហាក់ ក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ហើយរថយន្តរបស់គាត់ដែលត្រូវ ចោរលួចយកទៅបាត់នោះម៉ាកសាំយ៉ុង ពណ៌ស ពាក់ស្លាកលេខ ភ្នំពេញ2M-0822។ ដែលត្រូវចោរលួចបាត់ កាលពីវេលាម៉ោង១១ និង៣៨នាទីយប់ ពាក់កណ្ដាលអធ្រាត្រថ្ងៃទី ៤ ខែកក្កដា ឆ្នាំ២០១៧ នៅនឹងមុខផ្ទះរបស់គាត់ ដែលស្ថិតនៅក្នុងបុរី លឹម ឈាងហាក់ ភូមិជ្រៃកោង សង្កាត់ចោមចៅ ហើយដែលជាកន្លែងទុករាល់ថ្ងៃផងដែរ។

បុរសនោះបានបន្តទៀតថា នៅវេលាយប់កើតហេតុ ក្រោយពេលទុករថយន្តរួចគាត់ និងក្រុមគ្រួសារបាន នាំគ្នាចូលដេក បន្ទាប់មកក្រុមចោរបានចូលទៅធ្វើសកម្មភាពលួចយករថយន្ត ហើយគាត់បានឃើញដែរ ប៉ុន្តែមិនអាចចេញពីក្នុងផ្ទះបានឡើយ ព្រោះចោរបានយកខ្សែចងទ្វារផ្ទះគាត់ពីខាងក្រៅជាប់ មិនអាចចេញបាន។ ហើយគាត់បានខលទៅបងប្អូនឲ្យជួយ ប៉ុន្តែមិនមាននរណាមកទាន់ទេ ក្រុមចោរក៏បានបើកយករថយន្តចេញទៅបាត់ស្រមោល លុះរយ:ពេល១នាទីក្រោយចោរយករថយន្តទៅប៉ុណ្ណោះ ទើបគាត់អាចចេញ ពីក្នុងផ្ទះបាននិងតាមចោរប៉ុន្តែតាមមិនទាន់សោះ ទើបគាត់បានធ្វើដំណើរទៅកាន់ ប៉ុស្តិ៍នគរបាលចោមចៅ ភ្លាមៗដើម្បីដាក់ពាក្យបណ្ដឹង ឲ្យជួយអន្តរាគមន៍ ប៉ុន្តែនគរបាលហាក់មានការព្រងើយកន្តើយ មិនបានជួយ ដេញតាមឡើយនិងបានប្រាប់ឲ្យគាត់ ចាំព្រឹកមកដាក់ពាក្យបណ្ដឹងទៅវិញ។ ទង្វើបែបនេះពិតជាបានធ្វើឲ្យគាត់ខកចិត្ត និងអស់ជំនឿយ៉ាងខ្លាំងទៅលើនគរបាល ហើយគិតរហូតមកដល់ពេលនេះ មានរយ:ពេល៣ថ្ងៃហើយ ក៏គាត់នៅតែស្នើរសុំឲ្យនគរបាលមេត្តាជួយស្រាវជ្រាវរករថយន្តគាត់នេះមកវិញផង៕