Post News Media ព័ត៌មានជាតិ ម៉ូតូមួយជិះគ្...

ម៉ូតូមួយជិះគ្នា៤នាក់ លឿនដូចហោះជ្រុលទៅរថយន្តគេលាន់ដូចរន្ទះប៉ើងមនុស្សទៅលើដងផ្លូវ របួសធ្ងន់ស្រាលទាំងអស់

ចែកចាយបន្ត

ភ្នំពេញ: មនុស្ស៤នាក់ ក្នុងនោះមានស្រី២នាក់ ប្រុស២នាក់ បានជិះម៉ូតូមួយគ្រឿងម៉ាក ហុងដាសេ១២៥ ក្នុងល្បឿនលឿនតាមបណ្ដោយផ្លូវ១៩៨៦ ខណ:មកដល់ចំណុចក្បែរនឹងមន្ទីរពេទ្យសែនសុខ បានវាក់អឺជាមួយនឹងរថយន្តមួយគ្រឿងម៉ាកហាយឡែនឌ័រ ដែលកំពុងនឹងព្យាយាមបត់ពីមុខ ក៏ជ្រុលទៅបុករថយន្តពេញទំហឹងបណ្ដាលឲ្យមនុស្ស៤នាក់ ខាងលើហោះផ្លោងទៅនឹងថ្នល់ ក្នុងនោះធ្វើឲ្យយុវជន២នាក់របួសធ្ងន់ ចំណែកស្រីៗ២នាក់ទៀតរបួសស្រាល ។

ហេតុការណ៍នេះបានកើតឡើងកាលពីវេលាម៉ោង ១១និង៣០នាទីយប់ ថ្ងៃទី១០ ខែកក្កដា ឆ្នាំ២០១៧ ស្ថិតនៅតាមបណ្ដោយផ្លូវ១៩៨៦ ក្បែរនឹងមន្ទីរពេទ្យសែនសុខ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1G-1256 ជិះគ្នាបួននាក់ ប្រុស២ស្រី២ ក្នុងល្បឿនយ៉ាងលឿនតាមបណ្ដោយផ្លូវ១៩៨៦ ក្នុងទិសដៅពីកើតតមកលិច ខណ:មកដល់ចំណុចកើតហេតុ បានក៏បានវ៉ាក់អឺជាមួយនឹងរថយន្តមួយគ្រឿងដែលកំពុងព្យាយាមបត់នៅខាងមុខ ចាប់ហ្វ្រាំងមិនទាន់ ក៏បុកចំរថយន្តយ៉ាងពេញទំហឹង បណ្ដាលមនុស្សទាំង៤នាក់ហោះផ្លោងទៅនឹងថ្នល់រងរបួសធ្ងន់ស្រាលទាំង៤នាក់។ ដោយពួកប្រុសៗដែលរងរបួសធ្ងន់ ត្រូវបានរថយន្តសាមុយបញ្ជូនទៅមន្ទីរពេទ្យភ្លាមៗ។

ក្រោយកើតហេតុ រថយន្តបានរត់គេចខ្លួនបាត់ស្រមោល ពីកន្លែងកើតហេតុ។ ចំណែឯម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍រដ្ឋបាលភ្នំពេញថ្មី ដើម្បីរង់ចាំក្រុមគ្រួសារជនរងគ្រោះមកទទួលយកទៅវិញ៕