Post News Media ព័ត៌មានជាតិ បុរសម្នាក់ជិះ...

បុរសម្នាក់ជិះម៉ូតូលឿនដូចហោះ ហក់ទៅបុកព្រុសចំចំហៀងពេញទំហឹងបាក់ភ្លៅដោយខ្លួនឯង!

ចែកចាយបន្ត

ភ្នំពេញ: បុរសម្នាក់ ជិះម៉ូតូមួយគ្រឿងម៉ាក ហុងដាឌ្រីម ក្នុងល្បឿនយ៉ាងលឿន បានជ្រុលទៅបុករថយន្តព្រុសមួយគ្រឿងទៀត ត្រង់ចំណុចផ្លូវបែកជាបួន ដែលធ្វើដំណើរឆ្លងផ្លូវមិនទាន់ផុត បណ្តាលឲ្យបុរសជិះម៉ូតូហុងដា រងរបួសបាក់ភ្លៅម្ខាង ត្រូវបានបញ្ជូនទៅមន្ទីរពេទ្យភ្លាមៗ។

ហេតុការណ៍នេះបានកើតឡើងកាលពីវេលាម៉ោង១០និង១០នាទីយប់ ថ្ងៃទី១២ ខែកក្កដា ឆ្នាំ២០១៧ ត្រង់ចំណុចផ្លូវបែកបួន តាមបណ្តោយផ្លូវកម្ពុជាក្រោម កែងនឹងផ្លូវលេខ២៥៧ ស្ថិតក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្តមួយគ្រឿងម៉ាក ព្រុស ពណ៌ស ពាក់ស្លាកលេខភ្នំពេញ 2AN- 3997 ទើបតែចេញពីញ៉ាំអីជាមួយមិត្តភក្តិ បានបើករថយន្តត្រឡប់មកផ្ទះវិញ ដោយបានធ្វើដំណើរតាមបណ្តោយផ្លូវលេខ២៥៧ ក្នុងទិសដៅពីជើងទៅត្បូង ខណ:មកដល់កន្លែងកើតហេតុខាងលើ ត្រង់ចំណុចផ្លូវបែកជាបួន កែងនឹងផ្លូវកម្ពុជាក្រោម បើកឆ្លងផ្លូវមិនទាន់ផុតផង ស្រាប់តែមានម៉ូតូមួយគ្រឿងម៉ាក ហុងដាឌ្រីមសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1FK- 9608 ជិះដោយបុរសម្នាក់ តាមបណ្តោយផ្លូវកម្ពុជាក្រោម ក្នុងទិសដៅពីលិចទៅកើត ក្នុងល្បឿនយ៉ាងលឿន បានវ៉ាក់អើជាមួយរថយន្តព្រុសខាងលើ ចាប់ហ្រ្វាំងមិនទាន់ ក៏ជ្រុលទៅបុករថយន្តព្រុសចំទ្វារខាងមុខចំហៀងខាងស្តាំពេញទំហឹង បណ្តាលឲ្យរថយន្តព្រុស កំពិតនិងបែកកញ្ចក់ម្ខាង រងការខូចខាតស្ទើរតែទាំងស្រុង។ ចំណែកម៉ូតូហុងដាឌ្រីមវិញ បានរងការខូចខាតផ្នែកខាងមុខយ៉ាងដំណំ។ រីឯបុរសដែលជិះម៉ូតូហុងដាឌ្រីម បានរងរបួសបាក់ភ្លៅខាងឆ្វេងម្ខាង ត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យភ្លាមៗតែម្តង ។

ក្រោយពេលកើតហេតុសមត្ថកិច្ចជំនាញចរាចរណ៍បានចុះមកធ្វើការវាស់វែងយករថយន្តនិងម៉ូតូ ទៅរក្សាទុកនៅអធិការដ្ឋាននគរបាលខណ្ឌទួលគោកដើម្បីរង់ចាំភាគីទាំងសងខាងមកធ្វើការដោះស្រាយគ្នានៅពេលក្រោយ៕