Post News Media ព័ត៌មានជាតិ ឃាត់ខ្លួនឪពុក...

ឃាត់ខ្លួនឪពុកកូន២នាក់ ក្រោយបន្លំខ្លួនជាបុគ្គលិកអគ្គិសនីកម្ពុជា និងចេះកែច្នៃនាឡិកាស្ទង់

ចែកចាយបន្ត

កំពត: យោងតាមផេក អគ្គិសនីកម្ពុជា បានឲ្យដឹងថា កាលពីថ្ងៃទី១១ ខែកក្កដា ឆ្នាំ២០១៧ អគ្គិសនីកំពតបានដាក់ពាក្យបណ្ដឹង ទៅស្នងការដ្ឋាននគរបាលខេត្តកំពត ដើម្បីឃាត់ខ្លួនជនសង្ស័យ២ នាក់ ដែលបានបន្លំខ្លួនជាបុគ្គលិកអគ្គិសនីកម្ពុជា និងចេះកែច្នៃនាឡិកាស្ទង់។

លុះនៅវេលាម៉ោង១២ថ្ងៃត្រង់ដដែល មន្ត្រីនគរបាលព្រហ្មទណ្ឌខេត្តកំពត បានឃាត់ខ្លួនបុរស២នាក់ ដែលត្រូវជាឪពុក និងកូនដែលបានបន្លំខ្លួនជាបុគ្គលិកអគ្គិសនីកម្ពុជា នៅចំណុចរោងចក្រទឹកកក ដែលស្ថិតនៅភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត។

ជនសង្ស័យទាំង២នាក់ បានបន្លំខ្លួនជាបុគ្គលិកអគ្គិសនីកម្ពុជា ហើយប្រើស្លាកលេខឡាន 13-2-0803 ជារបស់ ក្រសួងឧស្សាហកម្មរ៉ែ និងថាមពល ដើម្បីប៉ុនប៉ងលួចថាមពលអគ្គិសនី និងប៉ុនប៉ងឆបោកម្ចាស់រោងចក្រទឹកកកថា ពួកគេចេះធ្វើឲ្យភ្លើងស៊ីតិច នៅភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត។

ជនសង្ស័យទាំង២នាក់ ទី១ឈ្មោះ តូច ទិប អាយុ៦០ឆ្នាំ នៅភូមិត្រពាំងវែង ឃុំអង្គភ្នំតូច ស្រុកអង្គរជ័យ ខេត្តកំពត (ឈ្មោះបន្លំនៅលើផ្លាកអាវអគ្គិសនីឈ្មោះ តូច សុភឿន) និងទី២ឈ្មោះ តូច ទិត្យ អាយុ៣៣ឆ្នាំ នៅភូមិត្រពាំងវែង ឃុំអង្គភ្នំតូច ស្រុកអង្គរជ័យ ខេត្តកំពត (ឈ្មោះបន្លំនៅលើផ្លាកអាវអគ្គិសនីឈ្មោះ តូច សុខនេត ប្រធានផ្នែក)។

បច្ចុប្បន្ននេះ ជនសង្ស័យទាំង២នាក់ខាងលើ ត្រូវបានមន្ត្រីនគរបាលបញ្ជូនខ្លួនទៅ តុលាការដើម្បីចាត់ការតាមនីតិវិធីច្បាប់៕