Post News Media ព័ត៌មានជាតិ រថយន្តបែន ម៉ា...

រថយន្តបែន ម៉ាកហ្វុយហ្សូមួយគ្រឿងបើកកៀរម៉ូតូនិច បណ្តាលឲ្យដួលស្លាប់និងរបួសធ្ងន់៣នាក់!

ចែកចាយបន្ត

កំពង់ស្ពឺ: លោកអធិការស្រុកភ្នំស្រួច បានប្រាប់Post Newsថា មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តម៉ាក ហ្វុយហ្សូ ប្រភេទបែន មួយគ្រឿង បើកបរខ្វះការប្រុងប្រយត្ន័ បានបើកទៅកៀរម៉ូតូស៊ុយសាគីនិច ដែលកំពុងជិះឌុបគ្នា៣នាក់ បណ្តាលឲ្យដួលស្លាប់ម្នាក់ និង២នាក់ទៀតរងរបួសធ្ងន់និងស្រាល។

ហេតុការណ៍នេះបានកើតឡើងកាលពីវេលាម៉ោង៧និង១០នាទី យប់ថ្ងៃទី១៥ ខែកក្កដា ឆ្នាំ២០១៧ ស្ថិតនៅចំណុចផ្លូវក្រាលកៅស៊ូព្រៃរំដួល ភូមិគីរីរស្មី ឃុំព្រៃរំដួល ស្រុកភ្នំស្រួច ខេត្តកំពង់ស្ពឺ។

ជនរងគ្រោះទាំង៣នាក់ ទី១ឈ្មោះ ខន ខេត ភេទប្រុស អាយុ២៤ឆ្នាំ ស្នាក់នៅភូមិក្រាំងបឹង ឃុំតាំងសំរោង ស្រុកភ្នំស្រួច ស្លាប់នៅកន្លែងកើតហេតុ ,ទី២ឈ្មោះ ណាន់ គាត ភេទស្រី អាយុ១៩ ឆ្នាំ របួសធ្ងន់ និងទី៣ឈ្មោះ ណាន់ ណាន ភេទប្រុស អាយុ ២២ឆ្នាំ របួសស្រាល ស្នាក់នៅភូមិឃុំជាមួយគ្នា។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ កើតឡើងរវាងរថយន្តមួយគ្រឿងម៉ាកហ្វុយហ្សូ ពាក់ស្លាកលេខ ភ្នំពេញ 3A-1278 បើកបរពីត្បូងទៅជើង លុះបានមកដល់ចំណុចខាងលើ ក៏បានកៀរម៉ូតូម៉ាកស៊ុយសាគីនិច ពណ៌ស ពាក់ស្លាកលេខ ភ្នំពេញ 1FK-6706 ដែលកំពុងជិះស្របទិសគ្នា បណ្តាលឲ្យអ្នកជិះម៉ូតូស្លាប់ម្នាក់ និងរបួសធ្ងន់ស្រាល២នាក់ តែម្តង ភ្លាមៗអ្នកបើកបររថយន្តបង្ក បានចុះពីលើរថយន្តរត់គេចខ្លួនបាត់ស្រមោល។

ក្រោយកើតហេតុ សមត្ថកិច្ចបានចុះមកធ្វើការវាស់វែង នាំយកវត្ថុតាងមករក្សាទុកនៅអធិការដ្ឋានដើម្បីរង់ចាំធ្វើការដោះស្រាយគ្នា តាមនិតិវិធីច្បាប់៕