Post News Media ព័ត៌មានជាតិ តុលាការកាត់ទោ...

តុលាការកាត់ទោសថៅកែក្រុមហ៊ុនទេសចរណ៍ស្រីរ័ត្ន រឿងចេញសែកស្អុយជិត៣ម៉ឺនដុល្លារ!

ចែកចាយបន្ត

ភ្នំពេញ: នៅព្រឹកថ្ងៃទី១៧ ខែកក្កដា ឆ្នាំ២០១៧នេះ លោក លាង សំណាត់ ចៅក្រមជំនុំជម្រះនៃសាលាដំបូង បានបើកសវនាការកាត់ទោសជនជាប់ចោទឈ្មោះ រស់ សុភីរ័ត្ន ជាថៅកែក្រុមហ៊ុនទេសចរណ៍ស្រីរ័ត្ន ពាក់ព័ន្ធករណីចេញសែកស្អុយចំនួន៧សន្លឹក គិតជាសាច់ប្រាក់ចំនួន២៩,០០០ដុល្លារ។

លោក តុប ឈុនឡុង តំណាងអយ្យការបានចោទប្រកាន់ជនជាប់ចោទឈ្មោះ រស់ សុភីរ័ត្ន ហៅស្រីរ័ត្ន ភេទស្រី អាយុ៣៦ឆ្នាំ ជាថៅកែក្រុមហ៊ុនទេសចរណ៍ស្រីរ័ត្ន ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរ បានប្រព្រឹត្តកាលពីអំឡុងឆ្នាំ២០១៣ ដល់ឆ្នាំ២០១៧ នៅរាជធានីភ្នំពេញ យោងតាមមាត្រា២៣១ នៃច្បាប់ស្តីពី ឧបករណ៍ដែលអាចជួញដូរបាន និងប្រតិបត្តិការទូទាត់សងប្រាក់។

នៅក្នុងសវនាការជនជាប់ចោទឈ្មោះ រស់ សុភីរ័ត្ន ឆ្លើយថាខ្លួនពិតជាបានចេញសែកអត់លុយចំនួន៧សន្លឹកមែន ដែលមានទឹកប្រាក់សរុបចំនួន២៩,០០០ដុល្លារ។

ជនជាប់ចោទបន្តថា សែកនោះខ្លួនចេញឲ្យទៅដើមបណ្តឹង ឈ្មោះ ង៉ោ កាវ ជាថ្លៃជួលផ្ទះរយ:ពេល៥ខែ ពីខែកញ្ញា ឆ្នាំ២០១៦ ដល់ខែមករា ឆ្នាំ២០១៧ និងលុយដែលជំពាក់ផ្សេងៗទៀត។

ឈ្មោះ ង៉ោ កាវ ភេទប្រុស អាយុ៦៦ឆ្នាំ ជាដើមបណ្ដឹងរដ្ឋប្បវេណី បានប្តឹងទាមទារឲ្យជនជាប់ចោទសងប្រាក់ដែលជំពាក់ថ្លៃផ្ទះគ្រប់ចំនួន៣៥,០០០ដុល្លារ និងលុយដែលជនជាប់ចោទខ្ចី៧,១០០ដុល្លារទៀត ដែលសរុបទាំងអស់ចំនួន៤២,១០០ដុល្លារ។

សូមបញ្ជាក់ថា នេះជារឿងដាច់ដោយឡែកមួយដែលជនជាប់ចោទឈ្មោះ រស់ សុភីរ័ត្ន មានបណ្ដឹងនៅតុលាការខណ:ដែលជនជាប់ចោទនៅមានករណីបណ្ដឹងឆបោកលុយអតិថិជនប្រមាណជាជិត៣០ម៉ឺនដុល្លារទៀត។

ទោះជាយ៉ាងណាសំណុំរឿងនេះ តុលាការបានលើកពេលទៅប្រកាសសាលក្រមនៅរសៀលថ្ងៃទី៣ ខែសីហា ឆ្នាំ២០១៧ ខាងមុខវិញ៕