Post News Media ព័ត៌មានជាតិ ហេតុតែចង់សាកល...

ហេតុតែចង់សាកល្បង! ចូលលុយគ្នាយកទៅថ្នាំមិនទាន់បានប្រើផង ត្រូវសមត្ថកិច្ចស្កាត់ជាប់!

ចែកចាយបន្ត

ភ្នំពេញ: បុរសម្នាក់ត្រូវបានសមត្ថកិច្ចខណ្ឌ៧មករាធ្វើការឃាត់ខ្លួន ដោយបានឆែកឆេររកឃើញមានលាក់ទុកនូវសារធាតុញៀនខុសច្បាប់ ចំនួនមួយកញ្ចប់តូច។

ប្រតិបត្តិការនេះបានធ្វើឡើងនៅវេលាម៉ោង២រំលងអធ្រាតឈានចូលថ្ងែទី១៨ ខែកក្កដា ឆ្នាំ២០១៧ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។

ប្រភពព័ត៌មានបានឲ្យដឹងថា ជនសង្ស័យមានឈ្មោះ ថា ភិន មករា ភេទប្រុស អាយុ២៨ឆ្នាំ មុខរបរបមិនពិតប្រាកដ កន្លែងស្នាក់នៅមិនពិតប្រាកដ។

ប្រភពពីសមត្ថកិច្ចបានឲ្យដឹងថា មុនពេលឈានដល់ការចាប់ឃាត់ជនសង្ស័យខាងលើ គឺកម្លាំងសមត្ថកិច្ចល្បាត ខណ្ឌ៧មករា បានជិះម៉ូតូល្បាតតាមគោលដៅ នៅម្តុំបុរីកីឡា ខណ:ពេលកំពុងជិះល្បាត ក៏ប្រទះឃើញជនសង្ស័យខាងលើ ដោយមានការសង្ស័យបានជិះម៉ូតូទៅជិត ហើយបានធ្វើការឆែកឆេរខ្លួនជនសង្ស័យ ក៏រកឃើញថ្នាំញៀនមួយកញ្ចក់តូច នៅជាប់ខ្លួនជនសង្ស័យ ក៏បានធ្វើការឃាត់ខ្លួនយកមកប៉ុស្តិ៍នគរបាលរដ្ឋបាលវាលវង់ដើម្បីសួរនាំតែម្តង។

តាមចម្លើយ ជនសង្ស័យបានបញ្ជាក់ប្រាប់ថា ថ្នាំញៀនមួយកញ្ចក់តូចនេះ គឺគេចូលលុយគ្នាជាមួយប្អូនៗដែលស្គាល់គ្នាយកទៅទិញដើម្បីសាកមើល ប៉ុន្តែមិនទាន់និងបានប្រើប្រាស់ផង ក៏ត្រូវកម្លាំងសមត្ថកិច្ចឃាត់ខ្លួនតែម្តង។

បច្ចុប្បន្នជនសង្ស័យត្រូវបានសមត្ថកិច្ចប៉ុស្តិ៍នគរបាលវាលវង់ធ្វើការឃាត់ខ្លួន ដើម្បីកសាងសំណុំរឿង ចាត់ការបន្តតាមនីតិវីធីច្បាប់៕