Post News Media ព័ត៌មានជាតិ រថយន្តអស់សាំង...

រថយន្តអស់សាំងឈប់លើផ្លូវមិនដាក់ស្លាកសញ្ញាម៉ូតូបើកលឿន បុកពីក្រោយស្លាប់អ្នកបើកបរ

ចែកចាយបន្ត

បន្ទាយមានជ័យ: ដោយការធ្វេសប្រហែសរបស់អ្នកបើកបររថយន្តធុនធំម្នាក់ ដែលបានឈប់មិនដាក់ស្លាកសញ្ញាចំនាំងផ្លាត បានធ្វើឲ្យយុវជនម្នាក់ ដែលជិះម៉ូតូលឿន នៅពេលយប់ទៅបុកគូថពីក្រោយ បណ្តាលឲ្យស្លាប់បន្ទាប់ពីបញ្ជូនដល់មន្ទីរពេទ្យ។

ហេតុការណ៍ដ៏គួរឲ្យរន្ធត់នេះ បានកើតឡើងនៅវេលាម៉ោង០២និង១៥នាទីយប់ ថ្ងៃទី១៣ខែសីហាឆ្នាំ២០១៧ លើកំណាត់ផ្លូវជាតិលេខ៥ ចំណុចមុខសាលាបឋមសិក្សាអូរអំបិល ស្ថិតក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។

លោក សួន នីប៉ូ នាយផ្នែកចរាចរណ៍ផ្លូវគោកនៃស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា នៅយប់កើតហេតុ មានរថយន្តធុនធំមួយគ្រឿង បានមកឈប់ចតដោយមិនបាក់ដាក់ស្លាកសញ្ញាចំនាំងផ្លាតទេ ហើយអ្នកបើកបរអះអាងថា ការឈប់ចតនេះ ព្រោះតែរថយន្តអស់ម៉ាស៊ូតទៅមុខលែងរួច។ចំណែកយុវជនរងគ្រោះ បានជិះម៉ូតូលឿនក្នុងគោលដៅស្របទិសពីកើតទៅលិចក៏បានបុកពីក្រោយរថយន្តពេញទំហឹង បណ្តាលឲ្យជាប់ម៉ូតូនឹងគូថរថយន្ត រីឯជនរងគ្រោះធ្លាយពោះចេញពោះវៀនមកក្រៅ ដួលដេកលើដី ហើយបានស្លាប់បន្ទាប់ពីបញ្ជូនដល់មន្ទីរពេទ្យ ហើយអ្នកបើកបររថយន្តក្រោយកើតហេតុ បានគេចខ្លួនបាត់ដោយទុកនៅតែព្រូម្នាក់នៅយាម។

លោក សួន នីប៉ូ បន្តថាជនរងគ្រោះ គេនៅមិនទាន់បានស្គាល់អត្តសញ្ញាណនៅឡើយទេ គ្រាដែលកំពុងស្រាវជ្រាវរកក្រុមគ្រួសារ។ លោកក៏បានបញ្ជាក់ទៀតថា គ្រោះថ្នាក់ចរាចរណ៍នេះ គឺផ្តើមចេញពីការឈប់ចតមិនដាក់ភ្លើងសញ្ញា ហើយម៉ូតូបើកលឿនអ្នកបើកបរមិនពាក់មួកការពារសុវត្ថិភាព៕