ព្រៃវែងៈ លោកស្នងការរងនគរបាលនៃស្នងការដ្ឋានខេត្តព្រៃវែង ទទួលផែន ចរាចរណ៍ បានប្រាប់Post News ថា មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីមានក្រុមស្ទាវមួយក្រុម ជិះម៉ូតូប្រដេញជែងគ្នា ហើយជ្រុលទៅបុករថយន្តពីក្រោយពេញទំហឹង បណ្តាលឲ្យដួលបោកក្បាលស្លាប់ទាំង២នាក់នៅនឹងកន្លែង។

ហេតុការណ៍កើតឡើងនៅវេលាម៉ោង៤ និង១៥នាទីរសៀល ថ្ងៃទី១៧ ខែកញ្ញា ឆ្នាំ២០១៧ នៅលើកំណាត់ផ្លូវជាតិលេខ៨ ចន្លោះគីឡូម៉ែត្រ១០៧-១០៨ ស្ថិតនៅក្នុងភូមិទានភ្លើង ឃុំស្មោងជើង ស្រុកកំចាយមារ ខេត្តព្រៃវែង។

មុនពេលកើតហេតុ គេឃើញជនរងគ្រោះទាំង២នាក់ខាងលើ ជិះម៉ូតូម៉ាកវ៉េវ ពណ៌ខ្មៅ ពាក់ស្លាកលេខ ព្រៃវែង1JH-4515 ជិះដោយឈ្មោះ វ៉ាន់ កាក់ អាយុប្រហែល១៧ឆ្នាំ ស្នាក់នៅភូមិព្រៃត្បែង ឃុំត្របែក ស្រុកកំចាយមារ និងអ្នករួមដំណើរឈ្មោះ ស៊ន សាន់ អាយុ១៩ឆ្នាំ ស្នាក់នៅភូមិព្រៃភ្លាំង ឃុំដំរីពូន ស្រុកស្វាយអន្ទរ បានប្រដេញជែងគ្នា ពីកើតទៅលិច លុះមកដល់កន្លែងកើតហេតុបានបុកពីក្រោយរថយន្តធំ មិនស្គាល់ម៉ាក ដួលបោកក្បាលស្លាប់ភ្លាមៗតែម្តង។

លោកស្នងការរងនគរបាលនៃស្នងការដ្ឋានខេត្តព្រៃវែង ទទួលផែន ចរាចរណ៍បានបញ្ជាក់ពីមូលហេតុ អ្នកបើកបរម៉ូតូជិះប្រដេញគ្នាជ្រុលទៅបុកគូថរថយន្តធំមិ នស្គាល់ម៉ាកគេបាត់ស្រមោល។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើកំណត់ហេតុ ចំណែកសាកសព បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕