សៀមរាបៈ កម្លាំងនគរបាលប្រឆាំងបទល្មើសសេដ្ឋកិច្ចខេត្ត សហការជាមួយមន្ទីរឧស្សាហកម្មសិប្បកម្មខេត្ត បានសម្រេចបិទទីតាំងផលិតទឹកបរិសុទ្ធយីហោ គីរីសិទ្ធិ មួយកន្លែង បន្ទាប់ពីរកឃើញថា គ្មានច្បាប់ត្រឹមត្រូវ។ ការចុះបិទអាជីវកម្មផលិតទឹកសុទ្ធនេះ ធ្វើឡើងនាព្រឹកថ្ងៃទី៣ ខែមិថុនា ឆ្នាំ២០១៦ ស្ថិតក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប ដែលមានម្ចាស់ឈ្មោះ សួន ព្រលឹង អាយុ២៧ឆ្នាំ រស់នៅទីតាំងផលិតទឹកសុទ្ធ។
លោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចខេត្ត បានឲ្យដឹងថា ទីតាំងផលិតទឹកបរិសុទ្ធខាងលើ មិនទាន់មានច្បាប់ត្រឹមត្រូវនោះទេ ដូច្នេះទើបខាងលោកសុំការសហការជាមួយខាងមន្ទីរជំនាញចុះពិនិត្យ។ លោកបន្តថា ក្រោយពិនិត្យហើយខាងលោកប្រគល់ការងារនេះ ឲ្យខាងមន្ទីរបន្តនីតិវិធីថា ត្រូវអនុវត្តយ៉ាងណា។
ចំណែកលោក តុប ធឿន ប្រធានការិយាល័យ នៃមន្ទីរឧស្សាហកម្មសិប្បកម្មខេត្ត ក៏បានបញ្ជាក់នៅកន្លែងកើតហេតុថា តាមពិតទីតាំងមួយនេះ មានចុះបញ្ជីដល់ក្រសួង ហើយគ្រាន់តែម្ចាស់រត់ច្បាប់មិនទាន់រួច បែរជាធ្វើអាជីវកម្ម។ ចំពោះឧបករណ៍ផលិត គឺមានលក្ខណៈត្រឹមត្រូវមានម៉ាកសញ្ញាគ្រប់គ្រាន់មានទាំងអនាម័យផងដែរ។ លោកបន្តថា ករណីនេះ សមត្ថកិច្ចសម្រេចបិទអាជីវកម្មនេះ ជាបណ្តោះអាសន្នសិន រង់ចាំឲ្យពួកគាត់រត់ច្បាប់ហើយ ទើបបើកឲ្យដំណើរការវិញ។
លោកបញ្ជាក់ទៀតថា បើទោះបីជាអាជីវកម្មនេះ ត្រូវបិទជាបណ្តោះអាសន្ន តែក៏ចាំបាច់ ត្រូវនាំយកម្ចាស់ទៅសាកសួរ និងផាកពិន័យតាមច្បាប់។ លោកថា ច្បាប់ស្តីពីការគ្រប់គ្រងឧស្សាហកម្ម សិប្បកម្ម អាចពិន័យក្នុងចន្លោះ៥០ម៉ឺនរៀល ទៅ២,៥លានរៀល៕
