Post News Media ព័ត៌មានជាតិ ក្រុមចោរលួចឆក...

ក្រុមចោរលួចឆក់កាបូបមួយក្រុម ឃើញទ្វារចំហរចូលទៅលួចយកកាបូបលុយត្រូវចាប់ខ្លួនបានម្នាក់

ចែកចាយបន្ត

ភ្នំពេញ: ក្រុមជនសង្ស័យ២នាក់ បានធ្វើសកម្មភាពចូលទៅលួចយកកាបូបលុយនៅក្នុងផ្ទះមួយកន្លែង ខណ:ដែលលោកយាយដែលជាម្ចាស់ កាបូបម្នាក់កំពុងពិសារបាយនៅក្នុងផ្ទះនោះដែល ប៉ុន្តែកាបូបនោះដាក់នៅកន្លែងផ្សេង មិនបានដឹងថាជនទាំងនោះចូលទៅលួចកាបូបគាត់ឡើយ ប៉ុន្តែនៅខណ:នោះត្រូវបានចៅស្រីរបស់គាត់មើលពីលើជាន់ទី១ទៅឃើញ ជនសង្ស័យកំពុងធ្វើសកម្មភាពក៏បានស្រែកថាចោរ ទើបបង្កឲ្យមានការភ្ញាក់ផ្អើលឡើង ហើយភ្លាមៗ នោះក៏បានរាយការណ៍ដល់កម្លាំងនគរបាលប៉ុស្ដិ៍កាកាប២ ភ្លាមៗហើយបាន ចុះសហការជាមួយចៅប្រុសម្ចាស់កាបូបចាប់ឃាត់ខ្លួនបានម្នាក់ចំណែកម្នាក់ទៀតបាន គេចខ្លួនបាត់ស្រមោលសូន្យឈឹង។

ហេតុការណ៍ខាងលើរនោះបានកើតឡើងកាលពីវេលាម៉ោង១១ និង៤០នាទីព្រឹក ថ្ងៃទី៣ ខែតុលា ឆ្នាំ២០១៧ នៅក្នុងភូមិចំការឪឡឹក សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យមានឈ្មោះ ហយ វណ្ណារ៉ា អាយុ២៥ឆ្នាំ ស្នាក់នៅក្នុងភូមិចំការឪឡឹក សង្កាត់កាកាប២ ខណ្ឌពោធិ៍សែនជ័យ និងម្នាក់ទៀតរត់គេចខ្លួនបាត់ឈ្មោះវង្ស។ ចំណែកលោកយាយ ដែលជាម្ចាស់កាបូបឈ្មោះ ជីម ខុន អាយុជាង៧០ឆ្នាំ ស្នាក់នៅក្នុងភូមកើតហេតុខាងលើ ហើយកាបូបបានយកបានមកវិញ ប៉ុន្តែលុយនៅក្នុងនោះចំនួនជាង១ពាន់ដុល្លារ ត្រូវបានជនដែលរត់គេចខ្លួននោះយកទៅបាត់អស់។

តាមប្រភពព័ត៌មានបានឲ្យដឹងថា នៅមុនពេលកើតហេតុលោកយាយបានទុកកាបូបលុយនៅលើសាឡុងនៅក្នុងផ្ទះ បន្ទាប់មកបាន ទៅហូបបាយ ដោយមិនបានបិទទ្វារផ្ទះនោះឡើយ ខណ:នោះស្រាប់តែក្រុមជនសង្ស័យខាងលើ ចូលទៅធ្វើសកម្មភាពលួចយក កាបូបលុយរួចបានគេចខ្លួន។ ចំណែកលោកយាយមិនបានដឹងនោះទេ ប៉ុន្តែសកម្មភាពរបស់ចោរត្រូវបានចៅស្រីលោកយាយម្នាក់ កំពុងស្ថិតនៅលើផ្ទះជាន់ទី១ប្រទះឃើញ ក៏បានស្រែកថាចោរបង្កឲ្យមានការភ្ញាក់ផ្អើល ទើបនគរបាលប៉ុស្ដិ៍ខាងលើចុះទៅសហការជាមួយចៅប្រុសរបស់លោកយាយចាប់បានម្នាក់ ចំណែកម្នាក់ទៀតបានយកលុយជាង១ពាន់ដុល្លារទៅបាត់ ដោយបានបោះ ចោលកាបូបស្ពាយរបស់លោកយាយចូលទៅក្នុងទឹក។

ក្រោយមកនគរបាលបាននាំជនម្នាក់ដែលចាប់ខ្លួនបាននោះទៅធ្វើការសាក សួរនិងកសាងសំណុំរឿងចាត់ការតាមច្បាប់៕