Post News Media ព័ត៌មានជាតិ យុវជនឈាមរាវ២ន...

យុវជនឈាមរាវ២នាក់ ត្រូវបានសមត្ថកិច្ចឃាត់ខ្លួន យកខ្សែក្រវ៉ាត់ដេញវ៉ៃគេដោយចេតនា

ចែកចាយបន្ត

ភ្នំពេញ: សមត្ថកិច្ចប៉ុស្តិ៍រដ្ឋបាលទឹកថ្លា ចាប់ឃាត់ខ្លួនយុវជនឈាមរាវ២នាក់ដោយចោទពីបទបង្កហិង្សាដោយចេតនា(យកខ្សែក្រវ៉ាត់ដេញវាយជនរងគ្រោះតាមផ្លូវសាធារណ:ព្រោះតែក្រុមខ្លួនខឹងរឿងថាជនរងគ្រោះជិតម៉ូតូប៉ះម៉ូតូខ្លួនហើយមិនឈប់សុំទោស)។

ហេតុការណ៍បង្កឲ្យមានការភ្ញាក់ផ្អើលឡើងកាលពីវេលាម៉ោង៩ និង៥០នាទីយប់ ថ្ងៃទី៣ ខែតុលា ឆ្នាំ២០១៧ ត្រង់ចំណុចផ្លូវសហព័ន្ធរុស្ស៊ីទល់មុខនិងវត្តទឹកថ្លា ស្ថិតក្នុងសង្កាត់ទឹកថ្លា ខណ្ឌសែនសុខ។

យុវជនឈាមរាវទាំង២ខាងលើ ទី១មានឈ្មោះ ធីម ដេវិត ភេទប្រុស អាយុ២០ឆ្នាំ មុខរបរជាងដែក ស្នាក់នៅទឹកល្អក់ទី២ ខណ្ឌទួលគោក មានស្រុកកំណើតនៅឃុំក្សេមក្សាម ស្រុកឧត្តង ខេត្តកំពង់ស្ពឺ ។ ទី២មានឈ្មោះ ឈើន ម៉ាប់ ភេទប្រុស អាយុ២៥ឆ្នាំ ស្នាក់នៅជាមួយគ្នា មានស្រុកកំណើតនៅឃុំព្រែករំដេង ខេត្តកំពង់ស្ពឺ ។
ចំណែកយុវជនរងគ្រោះមានឈ្មោះ វ៉ាន់ វុទ្ធី ភេទប្រុស អាយុ២០ឆ្នាំ ជានិសិត្ស ស្នាក់នៅភូមិCPC សង្កាត់ទឹកថ្លា ខណ្ឌសែនសុខ រាជធានី ភ្នំពេញ មានស្រុកកំណើតនៅស្រុកព្រះស្តេច ខេត្តព្រៃវែង។

តាមការបកស្រាយរបស់ជនរងគ្រោះខាងលើបានរៀបរាប់ប្រាប់សមត្ថកិច្ចឲ្យដឹងថា នៅមុនពេលកើតហេតុ រូបគេបានជិះម៉ូតូមួយគ្រឿងម៉ាក និច ពណ៌ស ពាក់ស្លាកលេខ ភ្នំពេញ1J-9323 ដែលទើបតែចេញមកពីផ្ទះនៅម្តុំផ្សារទំនើបរតនាផ្លាហ្សាដើម្បីទៅយកមិត្តភក្តិនៅម្តុំវិទ្យាល័យឥន្រ្ទទេវី ដោយធ្វើដំណើរតាមបណ្តោយផ្លូវសហព័ន្ធរុស្ស៉ី ក្នុងទិសដៅពីលិចទៅកើត។ លុះមកដល់ចំណុចកើតហេតុ ជនរងគ្រោះ ក៏បានឈប់ម៉ូតូដើម្បីទិញបាយ ហើយពេលដែលទិញរួចហើយយុវជនរងគ្រោះបំរ៉ុងនិងបើកម៉ូតូជិះបន្តដំណើរទៅមុខទៀត ខណ:នោះស្រាប់តែលេចមុខយុវជនបង្កទាំង២នាក់ខាងលើជិះម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ 1FU 8410 មកពីក្រោយហើយបានធ្វើសកម្មភាពដោះខ្សែក្រវ៉ាត់វាយទៅលើរូបខ្លួនតែម្តងធ្វើឲ្យខ្លួនដែលយុវជនរងគ្រោះភ័យស្លន់ស្លោផ្តួលម៉ូតូចោលរត់ទៅឲ្យគេជួយ ភ្លាមៗនោះក៏មានសមត្ថកិច្ចមូលដ្ឋានកំពុងតែជិះល្បាតមកដល់ចំណុចកើតហេតុហើយឃើញហេតុការណ៍រួចក៏ធ្វើការអន្តរាគមន៍ចាប់ឃាត់ខ្លួនយុវជនបង្កទាំង២នាំយកទៅសាកសួរនៅប៉ុស្តិ៍នគរបាលរដ្ឋបាលទឹកថ្លាតែម្តង។

សមត្ថកិច្ចបានបញ្ជាក់ឲ្យដឹងថាក្រុមជនបង្កបានឆ្លើយសារភាពថាពួកខ្លួនពិតជាបានធ្វើសកម្មភាពដោះខ្សែក្រវ៉ាត់ដេញវាយជនរងគ្រោះពិតប្រាកដមែនព្រោះតែខ្លួនខឹងនិងនិងជនរងគ្រោះថាជិះម៉ូតូប៉ះម៉ូតូខ្លួនហើយមិនសុំទោស។

បច្ចុប្បន្នយុវជនបង្កទាំង២នាក់និងវត្ថុតាងត្រូវបានកម្លាំងសមត្ថកិច្ចប៉ុស្តិ៍នគរបាលរដ្ឋបាលទឹកថ្លា កសាងសំណុំរឿងបញ្ជូនទៅអធិការដ្ឋាននគរបានខណ្ឌសែនសុខដើម្បីរង់ចាំការចាត់ការតាមនិតិវិធីច្បាប់៕