Post News Media ព័ត៌មានជាតិ ជាប់គុកមួយជីវ...

ជាប់គុកមួយជីវិត រឿងឃាតកម្មមួយហើយ ឥឡូវតុលាការកាត់ទោស សំណុំរឿង ឃាតកម្ម មួយថ្មីទៀត

ចែកចាយបន្ត

ភ្នំពេ​ញ: ជនជាប់ចោទម្នាក់ជា ឃាតករសម្លាប់ ប្អូនស្រីជីដូន១ ជាសិស្សវិទ្យាល័យ ពងទឹក កាលពីឆ្នាំ២០១៦ ដែលធ្លាប់ត្រូវបានតុលាការផ្តន្ទាទោស ដាក់ពន្ធនាគារអស់មួយជីវិត ម្តងរួចមកហើយនោះ នៅព្រឹកថ្ងៃទី៥ ខែតុលា ឆ្នាំ២០១៧នេះត្រូវបាន លោក ឌុច សុខសារិន ប្រធានក្រុមប្រឹក្សាចៅក្រមជំនុំជម្រះ នៃសាលាដំបូងរាជធានីភ្នំពេញ បើកសវនាការកាត់ទោស លើសំណុំរឿង ឃាតកម្ម កាលពីអំឡុងឆ្នាំ២០១៤ មួយរឿងទៀត។

លោក ខាំ សុផារី ជាតំណាងអយ្យការបាន ចោទប្រកាន់លើឈ្មោះ ជុំ វិរ: ភេទប្រុស អាយុ ២២ឆ្នាំ ស្នាក់នៅក្នុងភូមិតាបោះ សង្កាត់ព្រៃស ខណ្ឌដង្កោ ពីបទ ឃាតកម្ម លើជនរងគ្រោះឈ្មោះ ច្រិច ពិសិដ្ឋ ភេទប្រុស អាយុ ២៤ឆ្នាំប្រព្រឹត្តកាលពីយប់ថ្ងៃទី១៦ ខែមេសា ឆ្នាំ២០១៤ នៅចំណុចរណ្ដៅដីមួយកន្លែង ស្ថិតនៅក្នុងភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ យោងតាមមាត្រា ១៩៩ នៃក្រមព្រហ្មទណ្ឌ។

នៅក្នុងសវនាការ ជនជាប់ចោទឈ្មោះ ជុំ វិរ: បានបដិសេធថា ខ្លួនមិនបានប្រព្រឹត្តនោះទេ ហើយចំពោះចម្លើយនៅសមត្ថកិច្ច គឺនគរបាលវាយឲ្យសារភាពតែប៉ុណ្ណោះ។

យោងតាមរបាយការណ៍សួរយកចម្លើយរបស់សមត្ថកិច្ច កាលពីថ្ងៃទី១០ ខែឧសភា ឆ្នាំ២០១៦ ឈ្មោះ ជុំ វិរ: បានសារភាពថា នៅយប់កើតហេតុខ្លួន និងជនរងគ្រោះ បានទៅផឹកស៊ីនៅផ្ទះមិត្តឈ្មោះ គង់។

នៅពេលផឹកចប់ ជនរងគ្រោះស្រវឹងជោកជាំ និងជិះម៉ូតូម៉ាកគុបជ្រុង ចេញមកមុន តែខ្លួនមិនព្រមឲ្យមកព្រោះខ្លាចមានគ្រោះថ្នាក់ ទើបជិះម៉ូតូម៉ាក C១២៥ តាមពីក្រោយ ឃាត់កុំឲ្យទៅ។

នៅពេលនោះឈ្មោះ ច្រិច ពិសិដ្ឋ ជាជងរងគ្រោះ មិនព្រមឈប់ទេ ទើបខ្លួនបើកម៉ូតូទៅពាំងពីខាងមុខ ហើយពេលនោះជនរងគ្រោះបានវាយខ្លួន ទើបខ្លួនបាន វាយតបវិញ រហូតជនរងគ្រោះធ្លាក់ចូលក្នុងរណ្តៅស្លាប់ទៅ។

ក្រោយពេលវាយជនរងគ្រោះទម្លាក់ទឹករួច ខ្លួនបានអូសម៉ូតូជនរងគ្រោះទម្លាក់ទឹកដើម្បី ឲ្យគេយល់ច្រឡំថា ជនរងគ្រោះបានជិះម៉ូតូធ្លាក់ទឹកស្លាប់ មិនមែនជាអំពើឃាតកម្មនោះទេ។

សំណុំរឿងនេះត្រូវបានម្តាយឪពុកជនរងគ្រោះ តាំងខ្លួនជាដើមបណ្ដឹងរដ្ឋប្បវេណី ប្តឹងទាមទារ សំណងជំងឺចិត្ត ចំនួន ១ម៉ឺនដុល្លារ ពីជនជាប់ចោទ។

ទោះជាយ៉ាងណាសំណុំរឿងនេះត្រូវ តុលាការលើកពេលទៅប្រកាសសាលក្រមនៅរសៀលថ្ងៃទី១៣ ខែតុលា ឆ្នាំ២០១៧ ខាងមុខវិញ៕