Post News Media ព័ត៌មានជាតិ ជិះម៉ូតូ វ៉ាគ...

ជិះម៉ូតូ វ៉ាគេឯងខ្លាំងពេកទៅបុកឡង់គ្រឺស័រ ស្លាប់យ៉ាងរន្ធត់!

ចែកចាយបន្ត

កំពង់ស្ពឺ: លោក តាប់ លន ស្នងការរងខេត្តកំពង់ស្ពឺ ទទួលផែនចរាចរណ៍ បានប្រាប់Post Newsថា មានករណីគ្រោះថ្នាក់ចរាចរណ៍មួយបានកើតឡើង ដោយមានម៉ូតូមួយគ្រឿង បានបើកវ៉ារថយន្តដឹកដី ជ្រុលទៅបុកនឹងរថយន្តឡង់គ្រឺស័រ ពេញទំហឹង បណ្តាលឲ្យបុរសម្នាក់ស្លាប់យ៉ាងរន្ធត់។

ហេតុការណ៍នេះបានកើតឡើងកាលពីវេលាម៉ោង៦និង២០នាទីល្ងាច ថ្ងៃទី៤ ខែតុលា ឆ្នាំ២០១៧ ស្ថិតនៅចំណុចផ្លូវជាតិលេខ៤១ ចន្លោះគីឡូម៉ែត្រ១៥ .១៦ ចំណុចភូមិបឹងប្រស្រែ ឃុំព្រៃញាតិ ស្រុកគងពិសី ខេត្តកំពង់ស្ពឺ។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ កើតឡើងខណ:ដែលមូ៉ូតូម៉ាកហុងដាសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ 1CY-9438 បើកបរដោយឈ្មោះ តក់ ភារទ្ធិ ភេទប្រុស អាយុ១៧ឆ្នាំ រស់នៅភូមិត្រពាំងកក់ ឃុំទ្រា ស្រុកកណ្ដាលស្ទឹង ខេត្តកណ្ដាល បើកបរពីទិសខាងជើងទៅទិសខាងត្បូងមកដល់ចំណុចខាងលើក៏វ៉ារថយន្ដដឹកដីរួចជ្រុលបុករថយន្ដ១គ្រឿងទៀត ម៉ាកឡង់គ្រឺស័រ ពណ៌សំបកឪឡឹក ពាក់ស្លាកលេខ ខេមរភូមិន្ទ 2 3218អ្នកបើកបររត់គេចខ្លួនបាត់ ដែលកំពុងតែបើកបរបញ្រ្ចាសទិសគ្នា បណ្ដាលឲ្យអ្នកបើកបរម៉ូតូស្លាប់នៅកន្លែងកើតហេតុ។

ក្រោយកើតហេតុ សមត្ថកិច្ចបានយកមធ្យោបាយទាំង២គ្រឿង យកមករក្សាទុកនៅអធិការដ្ឋាននគរបាលស្រុកគងពីសី ដើម្បីកសាងសំណុំរឿងចាត់ការតាមនីតិវិធីច្បាប់បន្តទៀត៕