Post News Media ព័ត៌មានជាតិ អ្នកលេងភ្លេងក...

អ្នកលេងភ្លេងការ២នាក់ ជិះម៉ូតូទៅបុកគូថរថយន្តពេញទំហឹង បណ្តាលឲ្យស្លាប់និងរបួស

ចែកចាយបន្ត

កំពត: លោកអធិការរងស្រុកទឹកឈូ ទទួលផ្នែកចរាចរណ៍ បានប្រាប់ Post News ថាមានករណីគ្រោះថ្នាក់ចរាចរណ៍មួយបានកើតឡើង រវាងម៉ូតូមួយគ្រឿង ជិះដោយអ្នកលេងភ្លេងការ២នាក់ បានបើកទៅបុកពីក្រោយគូថរថយន្តម៉ាកអ៉ីស៊ុយស៊ុយពេញទំហឹង បណ្តាលឲ្យម្នាក់ស្លាប់ និងម្នាក់ទៀតរបួសធ្ងន់។

ហេតុការណ៍នេះកើតឡើងនៅម៉ោង៥និង៣០នាទីព្រឹក ថ្ងៃទី៧ ខែតុលា ឆ្នាំ២០១៧ ស្ថិតនៅចំណុច ផ្លូវជាតិលេខ៣ ភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត។

តាមប្រភពព័ត៌មានបានឲ្យដឹងថា មុនពេលកើតហេតុគេបានឃើញម៉ូតូម៉ាកវេវ ពណ៌ខ្មៅ ពាក់ស្លាកលេខ កំពត 1K-7046 ជិះឌុបគ្នាដោយបុរស២នាក់ ទី១ឈ្មោះ ជួប ឆៃយ៉ា ភេទប្រុស អាយុ៥២ឆ្នាំ រស់នៅភូមិបុះត្របែក ឃុំត្រពាំងព្រីង ស្រុកទឹកឈូ ខេត្តកំពត (ស្លាប់នៅកន្លែងកើតហេតុ)និងម្នាក់ទៀតឈ្មោះ ជួប វាសនា ភេទប្រុស អាយុ២៥ឆ្នាំ រស់នៅភូមិជាមួយគ្នា (របួសធ្ងន់) ក្នុងទិសដៅពីលិចទៅកើត លុះដល់ចំណុចកើតហេតុ ស្រាប់តែជ្រុលទៅបុកនឹងគូថរថយន្តម៉ាក អ៉ីស៊ុយស៊ុយ ពាក់ស្លាកលេខ ភ្នំពេញ 3C-6333 ចំពីក្រោយពេញទំហឹង បណ្តាលឲ្យបុរសម្នាក់ស្លាប់និងម្នាក់ទៀតរងរបួសតែម្តង។ ចំណែកអ្នកបើករថយន្តបង្ក បានចុះរត់គេចខ្លួនបាត់ស្រមោល។

ក្រោយកើតហេតុ សមត្ថកិច្ចបានចុះមកធ្វើការវាស់វែង យកទៅរក្សាទុកនៅអធិការដ្ឋាននគរបាលស្រុកទឹកឈូ​រង់ចាំដោះស្រាយគ្នាពេលក្រោយតាមច្បាប់បន្តទៀត ចំណែកសពប្រគល់ឲ្យក្រុមគ្រួសារធ្វើបុណ្យតាមប្រពៃណី៕