Post News Media ព័ត៌មានជាតិ បើកម៉ូតូឆ្លងផ...

បើកម៉ូតូឆ្លងផ្លូវមិនប្រយ័ត្ន ត្រូវរថយន្តបុកប៉ើងជិត២០ម៉ែត្រ បណ្តាលឲ្យរងរបួសធ្ងន់!

ចែកចាយបន្ត

ភ្នំពេញ: បុរសម្នាក់បើកម៉ូតូឆ្លងផ្លូវខ្វះការប្រុងប្រយត្ន័ ត្រូវបានរថយន្តបើកបុកពេញទំហឹងបណ្តាលឲ្យម៉ូតូនិងជនរងគ្រោះប៉ើងជិត២០ម៉ែត្រ បោកផ្ទប់នឹងថ្នល់រងរបួសធ្ងន់។

ហេតុការណ៍នេះកើតឡើងកាលពីវេលាម៉ោង១០និង៣០នាទីយប់ថ្ងៃទី៨ ខែតុលា ឆ្នាំ២០១៧ ស្ថិតនៅតាមបណ្តោយផ្លូវលេខ៥២៨ កែងនិងផ្លូវ២៨៧ ទល់មុខភោជនីយដ្ឋាន(ហេឡ) ក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ ។

យោងតាមប្រភពព័ត៌ពីកន្លែងកើតហេតុបានឲ្យដឹងថាមុនកើតហេតុ គេឃើញបុរសម្នាក់ជិះម៉ូតូមួយគ្រឿងម៉ាក MD ពណ៌ក្រហម គ្មានស្លាកលេខ ជិះតាមផ្លូវបណ្តោយផ្លូវលេខ២៨៧ ទិសដៅពីត្បូងទៅជើង លុះមកដល់ចំណុចកើតហេតុខាងលើ បានឆ្លងផ្លូវលេខ៥២៨បានពាក់កណ្តាល ក៏ត្រូវបានរថយន្តមួយគ្រឿងម៉ាក វីហ្គោ ពណ៌ខ្មៅ ពាក់ស្លាកលេខ ភ្នំពេញ 2K-3605 ជិះដោយបុរស២នាក់បើកបរតាមបណ្តោយផ្លូវខាងលើទិសដៅពីកើតទៅលិច ចាប់ហ្វ្រាំងទាន់ជ្រុលទៅបុកម៉ូតូពេញទំហឹង បណ្តាលឲ្យម៉ូតូនិងជនរងគ្រោះប៉ើងជិត២០ម៉ែត្រ រងរបួសធ្ងន់ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗ ចំណែករថយន្តនិងម៉ូតូរងការខូចខាតយ៉ាងដំណំ។

ក្រោយពេលកើតហេតុសមត្ថកិច្ចនគរបាលមូលដ្ឋានបានចុះមកដល់កន្លែងកើតហេតុ ដោយបានទំនាក់ទំនងទៅសមត្ថកិច្ចជំនាញចរាចរណ៍ខណ្ឌចុះមកវាស់វែងយករថយន្តនិងម៉ូតូទៅរក្សារទុកនៅអធិការដ្ឋាននគរបាលខណ្ឌទួលគោករង់ចាំដោះស្រាយគ្នាទៅតាមផ្លូវច្បាប់បន្តទៀត៕