Post News Media ព័ត៌មានជាតិ ឃាត់ខ្លួនជនសង...

ឃាត់ខ្លួនជនសង្ស័យបានម្នាក់ទៀតហើយក្នុងករណីឆ្កឹះសោរបងចូលលួចម៉ូតូចំនួន៣គ្រឿង

ចែកចាយបន្ត

ភ្នំពេញ: បុរសម្នាក់ ត្រូវកម្លាំងនរគបាលព្រហ្មទណ្ឌនៃអធិការដ្ឋាននរគបាលខណ្ឌទួលគោក ចុះឃាត់ខ្លួននៅក្នុងផ្ទះលេខ៤៦ ក្រុម៥៧ ភូមិ១៥ សង្កាត់ទឹកល្អក់១ ខណ្ឌទួលគោក រាជធានីភ្នំពេញ កាលពីវេលានៅម៉ោង២ និង២០នាទីរសៀល ថ្ងៃទី១០ ខែតុលា ឆ្នាំ២០១៧ ។

ជនសង្ស័យទាំង២នាក់ក្នុងចំណោម៤នាក់នោះគឺទី១ឈ្មោះ រ៉ែន ដារ៉ា ហៅរ៉ាភេទប្រុស អាយុ១៨ឆ្នាំ មុខរបរ មិនពិតប្រាកដ ស្នាក់នៅផ្ទះលេខ៤១ ផ្លូវរថភ្លើង ក្រុមទី៥៩ ភូមិ១៥ សង្កាត់ទឹកល្អកទី១ ខណ្ឌទួលគោក រាជធានីភ្នំពេញ។
ទី២ឈ្មោះ នាង ណាង ភេទប្រុស អាយុ២៨ឆ្នាំ មុខរបរ មិនពិតប្រាកដ ស្នាក់នៅផ្ទះលេខ៤៦ ក្រុម៥៧ ភូមិ១៥ ផ្លូវរថភ្លើង សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។

ចំណែកបក្ខពួក២នាក់ទៀតកំពុងគេចខ្លួននៅឡើយ។

ជនសង្ស័យឈ្មោះ នាង ណាង បានសារភាពនៅមុខសមត្ថកិច្ចថា ខ្លួនបានប្រព្រឹត្តបទល្មើសលួចឆ្កឹះសោរបងផ្ទះយកម៉ូតូបានចំនួន៣គ្រឿងដែលមានបក្ខពួកសរុបចំនួន៤នាក់ ។

យោងតាមការរៀបរាប់ពីលោក ស៊ឹម ពិសិដ្ឋ អធិការរងទទួលផ្នែកព្រហ្មទណ្ឌ នៃអធិការដ្ឋាននរគបាលខណ្ឌទួលគោក បានឲ្យដឹងថា មុនឈានចូលទៅឃាត់ខ្លួនជនសង្ស័យឈ្មោះ នាង ណាង នេះ កម្លាំងជំនាញបានកំណត់មុខសញ្ញាក្រុមគាស់ផ្ទះយកម៉ូតូចំនួន៣គ្រឿង និងបានឃាត់ខ្លួនបក្ខពួកម្នាក់ឈ្មោះរ៉ែន ដារ៉ាហៅរ៉ា ភេទប្រុស អាយុ១៨ឆ្នាំ កាលពីរាត្រី ថ្ងៃទី ៩ ខែតុលា ឆ្នាំ២០១៧ ។
ទើបកម្លាំងជំនាញរងចាំឃ្លំមើលជនសង្ស័យបានបង្ហាញខ្លួនភ្លាម កម្លាំងជំនាញព្រហ្មទណ្ឌចុះទៅដល់ផ្ទះមុខសញ្ញាភ្លាមផងដែរ ដើម្បីធ្វើការឃាត់ខ្លួន ។

បច្ចុប្បន្នកម្លាំងកំពុងសាកសួរ ស្រាវជ្រាវតាមប្រម៉ាញ់បក្ខពួកចំនួន២នាក់ទៀត យកមកផ្តន្ទាទោសទៅតាមផ្លូវច្បាប់ រីឯជនសង្ស័យទាំង២នាក់ ឃាត់ខ្លួនបាន កម្លាំងជំនាញកំពុងកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី៕