​ព្រះសីហនុៈ ករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង រវាងម៉ូតូនិងម៉ូតូ មនុស្ស៣នាក់បានស្លាប់នៅនឹងកន្លែង ក្នុងនោះមានជនបរទេសម្នាក់។

ហេតុការណ៍កើតឡើងនៅវេលាម៉ោង១០ និង១០នាទីយប់ ថ្ងៃទី៣១ ខែតុលា ឆ្នាំ២០១៧ លើផ្លូវ១៤៩C ត្រង់ចំណុច ជិតភ្នំ៩៦ ស្ថិតនៅក្នុងភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ។

នៅមុនពេលកើតហេតុ គេឃើញមានម៉ូតូធំ១គ្រឿង ម៉ាក ហុងដា ពណ៌ ក្រហម ពាក់ស្លាកលេខ ភ្នំពេញ 1BN-4546 បើកបរ ដោយ ជនបរទេស ឈ្មោះ Jammes CUmmis ភេទប្រុស អាយុ៣០ឆ្នាំ ជនជាតិអូស្រ្តាលី ស្នាក់នៅ ក្នុង សង្កាត់ លេខ៣ ក្រុងព្រះសីហនុ ក្នុងទិសដៅពីឆ្នេរអូឈើទាល ឆ្ពោះទៅឆ្នេរអូរត្រេះ លុះមកដល់ចំណុចកើតហេតុខាងលើ ក៏បានបុកប៉ះនឹងម៉ូតូ១គ្រឿង ម៉ាក ហុងដា សេ១២៥ ពណ៌ ខ្មៅ ពាក់ស្លាកលេខ ភ្នំពេញ 1FU -93 38 បើកបរ ដោយ ឈ្មោះ ញ៉ ចាន់ធី ភេទប្រុស អាយុ១៧ឆ្នាំ មុខរបរ កម្មករ មានទីលំនៅ ភូមិ ២ សង្កាត់លេខ២ ក្រុងព្រះសីហនុ មានអ្នករួមដំណើរជាមួយម្នាក់ទៀត ឈ្មោះ ឆែម មេសា ភេទប្រុស អាយុ១៧ឆ្នាំ មុខរបរ កម្មករ មានទីលំនៅ ភូមិ២ សង្កាត់លេខ២ ក្រុងព្រះសីហនុ ដែលមានទិសដៅបញ្រ្ចាសគ្នា បណ្ដាល ឲ្យស្លាប់ មនុស្ស៣នាក់ ក្នុងនោះមានជនបរទេសម្នាក់និងជនជាតិខ្មែរ២នាក់តែម្តង។

ក្រោយពេលកើតហេតុ សាកសពជនរងគ្រោះ ទាំង៣នាក់ បានយកទៅរក្សាទុកនៅ វត្តឥន្ទញ្ញាណ។ ចំណែកវត្ថតាង ម៉ូតូចំនួន២គ្រឿង យកមក រក្សាទុក នៅ ការិយាល័យនគរបាលចរាចរណ៍ផ្លូវគោក៕