Post News Media ព័ត៌មានជាតិ ម៉ូតូ១គ្រឿងបើ...

ម៉ូតូ១គ្រឿងបើកយ៉ាងលឿន បុករថយន្តចំពីមុខពេញទំហឹង ស្លាប់ម្នាក់ភ្លាមៗនៅនឹងកន្លែង

ចែកចាយបន្ត

កំពត: លោកវរសេនីយ៍ត្រី សេង រតនា អធិការរងស្រុកកំពង់ត្រាច ទទួលផ្នែកចរាចរណ៍ បានប្រាប់ Post News ថា កាលពីវេលាម៉ោង៥ និង៣៥នាទីល្ងាចថ្ងៃទី០៣ ខែវិច្ឆកា ឆ្នាំ២០១៧ មានករណីគ្រោះថ្នាក់ចរាចរណ៏ រវាងម៉ូតូ និងរថយន្ត ក្នុងទិសដៅបញ្ច្រាស់គ្នា បានបណ្ដាលឲ្យស្លាប់ម្នាក់ភ្លាមៗនៅនឹងកន្លែង ស្ថិតនៅលើផ្លូវជាតិលេខ33 ភូមិភ្នំសាឡី ឃុំកំពង់ត្រាចខាងលិច ខេត្តកំពត។

ម៉ូតូបង្កម៉ាកស៊ីរ៉ូស អត់ស្លាកលេខ ពណ៌ខ្មៅលាយលឿង បើកដោយឈ្មោះ កែវ ណាត ប្រុសអាយុ៤៥ ឆ្នាំ រស់នៅភូមិទួលស្រម៉ ឃុំស្តេចគង់ខាងជើង ស្រុកបន្ទាយមាស ខេត្តកំពត។

តាមសមត្ថកិច្ច បានឲ្យដឹងថា ម៉ូតូបានបើកក្នុងល្បឿនយ៉ាងលឿន ក្នុងទិសដៅពីលិចទៅកើត ក៏ទៅបុករថយន្តម៉ាក RANGER ពណ៌ខៀវ ពាក់ស្លាកលេខរាជការ 3438 ចំពីមុខពេញទំហឹង បណ្តាលស្លាប់ភ្លាមៗនៅកន្លែង រីឯអ្នកបើករថយន្ត មិនស្គាល់អត្តសញ្ញាណនោះទេ ដោយបើកបរក្នុងទិសដៅពីកើតទៅលិច។

ក្រោយកើតហេតុអ្នកបើករថយន្តបានរត់គេចខ្លួនបាត់ ទុករថយន្តចោល ទើបត្រូវសមត្ថកិច្ចយករថយន្ត និងម៉ូតូមករក្សាទុក នៅអធិការដ្ឋានដើម្បីរងចាំការដោះស្រាយគ្នា នៅពេលក្រោយ៕

ចែកចាយបន្ត