Post News Media ព័ត៌មានជាតិ ចង់ឈ្នះរាងខ្ល...

ចង់ឈ្នះរាងខ្លួន! ប្តីដាក់មួយដៃ ប្រពន្ធចាក់សាំងដុតវិញ ឆេះពេញខ្លួន!

ចែកចាយបន្ត

មណ្ឌលគិរី: លោកអធិការរងស្រុកកែវសីមា បានប្រាប់ Post News ថា មានករណីហិង្សាមួយបានកើតឡើងរវាងប្តីប្រពន្ធ២នាក់ បន្ទាប់ពីស្ត្រីជាប្រពន្ឋផឹកស៊ីស្រវឹង ហើយប្តីខឹងវាយមួយដៃតែនាងជាប្រពន្ឋសងវិញដោយចាក់សាំងដុតស្រោចពេញខ្លួន បង្កឲ្យមានការភ្ញាក់ផ្អើលយ៉ាងខ្លាំង។

ហេតុការណ៍កើតឡើងនៅវេលាម៉ោង៦ និង៣០នាទីយប់ ថ្ងៃទី ៥ ខែវិច្ឆិកា ឆ្នាំ២០១៧ ស្ថិតនៅភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី។
បង្កឡើងដោយប្រពន្ធឈ្មោះ ម៉ៃ យ៉ា អាយុ៤៣ឆ្នាំ មុខរបរ កសិករ មានស្រុកកំណើតនៅភូមិក្រសាំង ឃុំក្រសាំង ស្រុករមាសហែក ខេត្តស្វាយរៀង។ ជនរងគ្រោះត្រូវជាប្តីមានឈ្មោះ ប៊ូ ណាក់ អាយុ៤៧ឆ្នាំ មុខរបរ កសិករ មានស្រុកកំណើតភូមិស្មោងត្បូង ឃុំស្រឡូងស្រឡី ស្រុកកំចាយមារ ខេត្តព្រៃវែង(រងរបួសធ្ងន់)។ ចំណែកប្រពន្ធត្រូវបានប្តីវាយ បណ្តាលឲ្យរបួសត្រង់ចិញ្ចើមខាងឆ្វេង។

មុនពេលកើតហេតុ ជនបង្កជាប្រពន្ធផឹកស្រវឹងជាមួយអ្នកជិតខាងអស់ពេញមួយថ្ងៃមិនគិតគូជួយរកស៊ីប្តី ។ ក្រោយឃើញប្រពន្ធត្រឡប់មកពីស៊ីផឹកវិញ បុរសជាប្តីបានកើតមានចិត្តក្តៅប្រហាយក៏វាយប្រពន្ធមួយដៃទុកជាការប្រមាននឹងបន្ថយកំហឹង តែស្ត្រីជាប្រពន្ឋមិនព្រមចុះចាញ់នោះទេ ម្យ៉ាងដោយអំណាចនៃឥទ្ឋិពលទឹកប្តូរនិស្ស័យកំពុងជ្រាបពេញខ្លួនផងនោះ ក៏ស្ទុះវឹងទៅយកដបសាំងដែលមានចំនុះមួយលីត្រជះស្រោចទៅលើបុរសជាប្តី រួចកេះដែកកេះ ធ្វើឱ្យឆាបឆេះឡើងពេញខ្លួនតែម្តង។

ភ្លាមៗនោះអ្នកភូមិក៏បានជួយពន្លត់ភ្លើង និងដឹកបុរសរងគ្រោះទៅសម្រាកព្យាបាលរបួសនៅមណ្ឌលសុខភាព។

ចំពោះករណីនេះ សមត្ថកិច្ចបានឃាត់ខ្លួនស្ត្រីជាប្រពន្ធទៅសាកសួរនៅអធិការនគរបាលស្រុកកែវសីមា ដើម្បីកសាងសំណុំរឿងចាត់ការតាមនីតីវិធី ច្បាប់៕

ចែកចាយបន្ត