Post News Media ព័ត៌មានជាតិ គ្រោះថ្នាក់ចរ...

គ្រោះថ្នាក់ចរាចរណ៍រវាងម៉ូតូនិងរថយន្ត បណ្តាលឲ្យស្លាប់ម្នាក់និងរបួសធ្ងន់ម្នាក់!

ចែកចាយបន្ត

បន្ទាយមានជ័យ: ករណីគ្រោះថ្នាក់ចរាចរណ៍មួយបានកើតឡើងរវាងម៉ូតូនិងរថយន្ត បណ្តាលឲ្យយុវជនម្នាក់បានស្លាប់ភ្លាមៗនៅនឹងកន្លែង និងម្នាក់ទៀតរងរបួសធ្ងន់។

ហេតុការណ៍ដ៏រន្ធត់នេះកើតឡើងនៅវេលាម៉ោង៧ និង៣០នាទីយប់ ថ្ងៃទី៩ ខែវិច្ឆិកា ឆ្នាំ២០១៧ នៅលើកំណាត់ផ្លូវជាតិលេខ៥ ស្ថិតក្នុងភូមិពោធិរៀង ឃុំអូរប្រសាទ ស្រុកមង្គបូរី ខេត្តបន្ទាយមានជ័យ។

សមត្ថកិច្ចបានឲ្យដឹងថា ជនរងគ្រោះអ្នកជិះម៉ូតូឈ្មោះ ប្រាក់ ទី ភេទប្រុស អាយុ១៩ឆ្នាំ ស្នាក់នៅភូមិព្រៃទទឹង ឃុំភ្នំតូច ស្រុកមង្គលបូរី បានស្លាប់នៅនឹងកន្លែង និងអ្នករួមដំណើរឈ្មោះ ឌី ឆាលី ភេទប្រុស អាយុ២១ឆ្នាំ របួសធ្ងន់ បាក់ឆ្អឹងស្មងជើងខាងស្តាំ ស្នាក់នៅភូមិបឹងរាំង ឃុំភ្នំតូច ស្រុកមង្គលបូរី ត្រូវបានបញ្ជូនទៅសង្រ្គោះនៅមន្ទីរពេទ្យ។

ប្រភពដដែលបន្តថា នៅមុនពេលកើតហេតុ គេឃើញម៉ូតូ ម៉ាក MSX ពណ៌ខ្មៅ ពាក់ស្លាកលេខ បន្ទាយមានជ័យ1N-1173 ជិះពីទិសជើងទៅត្បូង ក្នុងល្បឿនលឿនដោយស្ថានភាពស្រវឹង លុះមកដល់ចំណុចកើតហេតុបានបុករថយន្តម៉ាក ហ៊ីយ៉ាន់ដាយ ធុនធំ ពណ៌ស ពាក់ស្លាកលេខ ព្រះសីហុន3A-1384 ប្រភេទដឹកទំនិញ ពីក្រោយដែលឈប់ចតអ្នកបើកបរចុះទៅទិញទឹក បណ្តាលឲ្យអ្នកបើកបរម៉ូតូបែកក្បាលស្លាប់នៅនឹងកន្លែងនិងម្នាក់ទៀតរបួសធ្ងន់។ ចំណែកអ្នកបើបររថយន្តរត់គេចខ្លួនបាត់ស្រមោល។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែងនិងនាំយកវត្ថុតាងទាំង២គ្រឿង យកមករក្សាទុកនៅអធិការដ្ឋាននគរបាល ដើម្បីដោះស្រាយនៅពេលក្រោយ៕