Post News Media ព័ត៌មានជាតិ គ្រោះថ្នាក់ចរ...

គ្រោះថ្នាក់ចរាចរណ៍រវាងរថយន្តនិងម៉ូតូ បណ្តាលឲ្យបុរសម្នាក់ស្លាប់ នៅស្រុកព្រៃនប់

ចែកចាយបន្ត

ព្រះសីហនុ: ករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្តនិងម៉ូតូ បណ្តាលឲ្យបុរសម្នាក់ស្លាប់ភ្លាមៗនៅនឹងកន្លែង។
ហេតុការណ៍កើតឡើងនៅវេលាម៉ោង៣ និង៥៥នាទីល្ងាច ថ្ងៃទី១២ ខែវិច្ឆិកាឆ្នាំ២០១៧ នៅលើដងផ្លូវជាតិលេខ៤ ចន្លោះគីឡូ១៨១-១៨២ ស្ថិតក្នុងភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញមានរថយន្តធំ១គ្រឿង ពាក់ស្លាកលេខ ក១៩១៦ ភព៣ ទិសដៅពីព្រះសីហនុទៅភ្នំពេញ បើកបរដោយឈ្មោះ ឃុត សុខា ភេទប្រុសអាយុ២៨ឆ្នាំ មុខរបរ បើកបរ ស្នាក់នៅភូមិសំរឹទ្ធ ឃុំតាំងក្រូច ស្រុកសំរោងទង ខេត្តកំពង់ស្ពឺ លុះមកដល់ចំណុចកើតហេតុខាងលើ បានបុកនឹងម៉ូតូ១គ្រឿង ម៉ាកវ៉េវ ពណ៌ខ្មៅ គ្មានស្លាកលេខ ក្នុងទិសដៅបញ្ច្រាសគ្នា បណ្តាលឲ្យអ្នកជិះម៉ូតូស្លាប់ភ្លាមៗនៅនឹងកន្លែងកើតហេតុ។ ចំណែកឯអ្នកបើកបររថយន្តបានរត់គេចខ្លួន តែត្រូវបានកម្លាំងកងរាជអាវុធហត្ថ ស្រុកព្រៃនប់ដេញចាប់និងឃាត់ខ្លួនបានភ្លាមៗក្នុងចម្ងាយប្រមាណជាង៥០០ម៉ែត្រពីកន្លែងកើតហេតុ។

បច្ចុប្បន្ន ម្ចាស់រថយន្តត្រូវបានកម្លាំងនគរបាលអធិការដ្ឋាននគរបាលស្រុកព្រៃនប់ឃាត់ខ្លួន ដើម្បីសាកសួរ កសាងសំរឿងចាត់វិធានការបន្តតាមនិតិវិធីច្បាប់៕