Post News Media ព័ត៌មានជាតិ ស៊យហួស! លួចបា...

ស៊យហួស! លួចបានគោពីយប់ ព្រឹកឡើងដើរកអ្នកទិញ ស្រាប់តែជួបនិងម្ចាស់គោ ចាប់ប្រគល់ឲ្យសមត្ថកិច្ច

ចែកចាយបន្ត

ភ្នំពេញ: ជនសង្ស័យម្នាក់ ក្នុងចំណោមបក្ខពួក ២នាក់ បានធ្វើសកម្មភាពលួចគោគេ ១ក្បាលបានសម្រេច កាលពីពេលយប់ លុះព្រឹកឡើងសត្វគោនោះបានងាប់ ជនសង្ស័យ ក៏បានដើររកអ្នកទិញគោ ស្រាប់តែហៅចំម្ចាស់គោ ដែលបាត់កំពុងតែដើរកនោះ មានអីចាប់ប្រគល់ឲ្យសមត្ថកិច្ចតែម្ដង។

ហេតុការណ៍នេះ បានកើតឡើងកាលពីវេលាម៉ោង៨ និង១០ នាទីព្រឹក ថ្ងៃទី១៥ ខែវិច្ឆិកា ឆ្នាំ២០១៧ នៅចំណុចក្រោយមណ្ឌសុខភាពសែនសុខ ភូមិសែនសុខ៥ សង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រភពពីសមត្ថកិច្ច បានបញ្ជាក់ថា ជនសង្ស័យមានឈ្មោះ ឈួន រ៉េត ប្រុសអាយុ២៩ឆ្នាំ មុខរបរ និងទីកន្លែងស្នាក់នៅមិនពិតប្រាកដ មានស្រុកកំណើតនៅភូមិអូរ ឃុំបឹងឈូក ស្រុកត្រាំកក់ ខេត្តតាកែវ។
ចំណែកឯម្ចាស់គោមានឈ្មោះ ឈន សុខភី ភេទប្រុស អាយុ៤៩ឆ្នាំ មុខរបរកសិក ស្នាក់នៅផ្ទះលេខ២០៦ ផ្លូវលេខ២០៤ ភូមិសែនសុខ៦ សង្កាត់ឃ្មួញ ខណ្ឌសែនសុខ។

ប្រភពពីម្ចាស់គោ បានរៀបរាប់ប្រាប់សមត្ថកិច្ចថា កាលពីយប់ថ្ងៃទី១៤ ខែវិច្ឆិកា ឆ្នាំ២០១៧ រូបគាត់បានយកសត្វគោញី១ក្បាល ពណ៌ស ទៅចងនៅក្នុងក្រោលដីឡូមួយកន្លែង លុះនៅវេលាម៉ោង១ និ៣០នាទីយប់ បានបាត់សត្វគោនោះ ហើយក៏បាននាំគ្នាដើររក ចៃដន្យអីដល់វេលាម៉ោង៦ព្រឹក មានមនុស្សម្នាក់មករកអ្នកទិញគោ ស្រាប់តែហៅប៉ះចំគាត់ ដែលជាម្ចាស់គោបានបាត់តាំងពីយប់។ ពេលនោះគាត់ក៏សង្ស័យបានឲ្យជននោះជួន ទៅកន្លែងគោនោះ ហើយក៏ឃើញជនសង្ស័យ បានលើកសត្វគោដាក់លើរទេះ ដែលគ្របតង់ពីលើ ហើយគាត់ក៏បើកតង់មើល ទើបដឹងថាជាគោរបស់គាត់។ ភ្លាមៗនោះជនសង្ស័យ ដែលហៅគាត់ទិញសត្វគោនោះ បានគេចខ្លួនបាត់ នៅសល់តែបក្ខពួកម្នាក់ឈ្មោះ ឈួន រ៉េត ត្រូវបានម្ចាស់គោ នាំខ្លួនយកមកប្រគល់ឲ្យសមត្ថកិច្ចប៉ុស្តិ៍ឃ្មួញតែម្តង។

បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅតុលាកា ចាត់ការបន្ត៕

ចែកចាយបន្ត