Post News Media ព័ត៌មានជាតិ ជិះលឿនខ្លាំងព...

ជិះលឿនខ្លាំងពេក បុកស្ត្រីវ័យចំណាស់កំពុងដើរឆ្លងផ្លូវ ខ្ទាតជាង៥ម៉ែត្រ របួសទាំងសងខាង!

ចែកចាយបន្ត

ភ្នំពេញ: បុរសម្នាក់ជិះម៉ូតូក្នុងល្បឿនលឿន ជ្រុលទៅបុកស្ត្រីវ័យចំណាស់ ខណ:កំពុងដើរឆ្លងផ្លូវ បណ្តាលឲ្យខ្ទាតជាង៥ម៉ែត្រ រងរបួសទាំងសងខាង កាលពីវេលាម៉ោង៤និង៣០នាទីរសៀលថ្ងៃទី១៣ ខែមករា ឆ្នាំ២០១៨ ស្ថិតនៅចំណុចច្រកទី៣ មុខផ្សារគីឡូម៉ែត្រលេខ៦ តាមបណ្តោយផ្លូវជាតិលេខ៥ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។

ស្ត្រីរងគ្រោះខាងលើមានវ័យចំណាស់មិនត្រូវបានស្គាល់ឈ្មោះនោះទេ។ចំណែកបុរសដែលរងរបួសដែរនោះជិះម៉ូតូបង្កម៉ាកឌ្រីមស៊េរី០៧ មិនចំណាំស្លាកលេខ ត្រូវបានសមត្ថកិច្ចមូលដ្ឋានយកទៅរក្សាទុក។

ប្រភពព័ត៌មាននៅកន្លែងកើតហេតុឲ្យដឹងថា នៅមុនពេលកើតហេតុ ស្ត្រីវ័យចំណាស់ខាងលើ បានដើរចេញពីផ្សារគីឡូម៉ែត្រលេខ៦ ពីលិចទៅកើត ឆ្លងផ្លូវជាតិលេខ៥ ខណ:ដើរជិតដល់ទ្រូវផ្លូវ ក៏ស្រាប់តែមានបុរសម្នាក់ជិះម៉ូតូបង្កខាងលើក្នុងល្បឿនយ៉ាងលឿនទិសដៅពីជើងទៅត្បូងតាមបណ្តោយផ្លូវជាតិលេខ៥ ជ្រុលទៅបុកស្ត្រីវ័យចំណាស់ពេញទំហឹងខ្ទាតជាង៥ម៉ែត្ររងរបួសថ្ងាស់ខាងស្តាំ ចំណែកបុរសជិះម៉ូតូបង្ករបួសជង្គង់ខាងឆ្វេងយ៉ាងដំណំ។

ក្រោយពេលកើតហេតុអ្នករងរបួសទាំង២នាក់ត្រូវបានដឹកតាមរម៉កកង់បីទៅព្យាបាលរបួសនៅមន្ទីរពេទ្យសម្តេចឪ ក្នុងសង្កាត់គីឡូម៉ែត្រលេខ៦។ រីឯម៉ូតូត្រូវសមត្ថកិច្ចមូលដ្ឋានវាស់វែងយកទៅរក្សាទុករង់ចាំភាគីទាំងសងខាងចូលដោះស្រាយនៅពេលក្រោយប្រសិន បើស្ថានភាពរបួសអាចដោះស្រាយបាន៕

ចែកចាយបន្ត