​សៀមរាបៈ លោកវរសេនីយ៍ឯក ណុប សារ៉ាក់ អធិការស្រុកសូទ្រនិគម បានប្រាប់ Post News ថា មានករណីគ្រោះថ្នាក់ចរាចរណ៍ រវាងរថយន្តបុកអ្នកលក់ក្រឡាន បណ្ដាលឲ្យស្រ្តី២នាក់ ស្លាប់និងរបួសធ្ងន់។

ហេតុការណ៍កើតឡើងនៅវេលាម៉ោង១និង៣០នាទីរសៀល ថ្ងៃទី២៧ ខែ មីនា ឆ្នាំ២០១៨ ត្រង់ចំណុចលើដងផ្លូវជាតិលេខ៦ សិ្ថតនៅភូមិខ្ចាស់ ឃុំខ្ចាស់ ស្រុកសូទ្រនិគម ខេត្តសៀមរាប។

រថយន្តបង្កម៉ាកkiatitan ពណ៌ស ផលិតឆ្នាំ១៩៩៥ ពាក់ស្លាកលេខ កំពង់ចាម2A-2991 អ្នកបើកបរដោយឈ្មោះ រស់ រាន់ ភេទប្រុស អាយុ២៣ឆ្នាំ នៅភូមិដូនទាវ ឃុំរលួស ស្រុកបា្រសាទបាគង ខេត្តសៀមរាប បើកបរក្នុងទិសដៅពីលិចទៅកើត បានរេចង្កូតទៅបុកអ្នកអង្គុយលក់ក្រឡាននៅខាងត្បូងផ្លូវ បណ្ដាលឲ្យឈ្មោះ គឿយ ស្រីម៉ៅ ភេទស្រី អាយុ២៣ឆ្នាំ នៅភូមិខ្ចាស់ ឃុំខ្ចាស់ ស្រុកសូទ្រនិគម ខេត្តសៀមរាប(ស្លាប់) និងឈ្មោះ ថូ ផ្លិច ភេទស្រី អាយុ៣៣ឆ្នាំ នៅភូមិខ្ចាស់ ឃុំខ្ចាស់ ស្រុកសូទ្រនិគម ខេត្តសៀមរាប(របួសធ្ងន់)៕