ភ្នំពេញៈ ក្រសួងកិច្ចការនារីនៅថ្ងៃទី៤ ខែកក្កដា ឆ្នាំ២០១៦នេះ បានដឹកនាំនូវកិច្ចប្រជុំពិសេសមួយ ដោយមានតំណាងមកពី១៥ ក្រសួងពាក់ព័ន្ធ និងអង្គការសង្គមស៊ីវិល ដើម្បីជំរុញការអនុវត្ត និងការពិនិត្យតាមដានការអនុវត្តផែនការសកម្មភាពជាតិទី២ ស្តីពីការទប់ស្កាត់អំពើហិង្សាលើស្ត្រី ដែលជាគោលនយោបាយជាតិ ដ៏សំខាន់មួយ ដើម្បីធ្វើការឆ្លើយតបទៅនឹងបញ្ហាអំពើហិង្សាប្រព្រឹត្តដោយដៃគូជិតស្និទ្ធ និងអំពើហិង្សាផ្លូវភេទនៅក្នុងប្រទេសកម្ពុជា។

លោកស្រីវេជ្ជ. អ៊ឹង កន្ថាផាវី រដ្ឋមន្ត្រី ក្រសួងកិច្ចការនារី បានមានប្រសាសន៍ថា៖ “ខណៈពេលយើងកំពុងនិយាយនៅទីនេះ មានស្ត្រីកំពុងទទួលរងនូវអំពើរំលោភបំពាន និងអំពើហិង្សា ឬត្រូវបានសម្លាប់ដោយសហព័ទ្ធ និងដៃគូរបស់ពួកគេនៅទូទាំងប្រទេសកម្ពុជា។ ខ្ញុំសង្ឃឹមថា វិធីសាស្ត្រធ្វើការងារថ្មី និងយន្តការរាយការណ៍ដ៏សាមញ្ញជាងមុនដែលយើងបានអនុម័តក្នុងថ្ងៃនេះ នឹងជួយក្រសួងពាក់ព័ន្ធទាំងអស់ឲ្យធ្វើការប្រឹងប្រែងជាថ្មី និងធ្វើការគៀងគរ នូវធនធានមនុស្ស និងហិរញ្ញវត្ថុឲ្យកាន់តែច្រើនឡើងដើម្បីបញ្ឈប់នូវការរំលោភបំពានសិទ្ធិមនុស្សដ៏ដែលមិនអាចទទួលយកបាននេះ”។

លោកស្រី Wenny Kusuma តំណាង អង្គការ UN Women ប្រចាំប្រទេសកម្ពុជា បានមានប្រសាសន៍ថា “ថ្ងៃនេះយើងបានធ្វើដំណើរមកដល់ពាក់កណ្តាលផ្លូវនៃការអនុវត្តផែនការសកម្មភាពជាតិស្តីពីការទប់ស្កាត់អំពើហិង្សាលើស្ត្រី(២០១៤-២០១៨) ដោយមានអារម្មណ៍ចម្រុះពីព្រោះនៅមានការងារជាច្រើនទៀតដែលយើងត្រូវធ្វើ”។

លោកបន្តថា តាមការសិក្សាស្រាវជ្រាវថ្នាក់ជាតិមួយដែលគាំទ្រដោយអង្គការ UN Women និងអង្គការសុខភាពពិភពលោក ដែលត្រូវបានផ្សព្វផ្សាយនៅចុងឆ្នាំកន្លងទៅនេះ បានឲ្យដឹងថា ស្ត្រីកម្ពុជាម្នាក់ក្នុងចំណោម៥នាក់ អាយុពី ១៥ ដល់ ៦៤ឆ្នាំ ដែលធ្លាប់រៀបការ ឬមានដៃគូ បានទទួលរងនូវអំពើហិង្សាលើរាងកាយ និង/ឬអំពើហិង្សាផ្លូវភេទដោយដៃគូជិតស្និទ្ធនៅក្នុងមួយជីវិតរបស់ពួកគេ។ មានសិក្សាស្រាវជ្រាវមួយទៀតរបស់អង្គការសហប្រជាជាតិដែលបានបោះពុម្ភផ្សាយក្នុងឆ្នាំ ២០១៣បានរកឃើញថា ជនល្មើសជាបុរសកម្ពុជាស្ទើរជិតពាក់កណ្តាលមិនដែលបានប្រឈមនឹងការដោះស្រាយតាមនីតិវិធីច្បាប់ទាល់តែសោះ។ ទិន្នន័យទាំងអស់នេះ វាកំពុងពញ្ញាក់និងបង្ហាញថា ការឆ្លើយតបចំពោះអំពើហិង្សាលើស្ត្រីពីរដ្ឋាភិបាលកម្ពុជានៅមិនទាន់គ្រប់គ្រាន់នៅឡើយ។

លោកបណ្ឌិត Ludgera Klemp កុងស៊ុលនៃស្ថានទូតអាល្លឺម៉ង់ បានមានប្រសាសន៍ថា ប្រទេសអាល្លឺម៉ង់បានធ្វើការគាំទ្រក្រសួងកិច្ចការនារី និងអង្គការមិនមែនរដ្ឋាភិបាលចំនួនបួន (រួមមានអង្គការកម្ពុជាដើម្បីជួយស្ត្រីមានវិបត្តិ អង្គការចិត្តសង្គម អន្តរវប្បធម៌ អង្គការជំនួយផ្នែកច្បាប់នៅកម្ពុជា និងអង្គការបន្ទាយស្រី) ដើម្បីពង្រឹងនូវកិច្ចសម្របសម្រួល គុណភាព និងលទ្ធភាពទទួលបាននូវសេវារបស់ស្ត្រី និងក្មេងស្រីរងគ្រោះពីអំពើហិង្សាទាក់ទងនឹងយេនឌ័រ។

គួររំឭកថា ឆ្នាំ២០១៤ និង ២០១៥ ស្ត្រី និងក្មេងស្រីលើសពី៤០០០នាក់ ដែលរួចផុតពីអំពើហិង្សាដោយដៃគូជិតស្និទ និងអំពើហិង្សាផ្លូវភេទ ព្រមទាំងកូនៗរបស់ពួកគាត់បានទទួលសេវាជំនួយផ្សេងៗ នៅក្នុងខេត្តកំពង់ធំ និងខេត្តសៀមរាប។ អំពើហិង្សាលើពលករស្រ្តីកម្ពុជា ព្រមទាំងអំពើជួញដូរស្ត្រី និងក្មេងស្រីនៅតែជាបញ្ហាអាទិភាព៕