ភ្នំពេញៈ រថយន្តយីឌុបធុនធំមួយគ្រឿង ដឹកផ្លែស្វាយច្រើនពេកបណ្តាលឲ្យដាច់កង់ អូសនឹងថ្នល់ បែកផ្កាភ្លើង ឆេះកង់រថយន្ត ផ្អើលប្រជាពលរដ្ឋធ្វើដំណើរ និងសមត្ថកិច្ចជួយពន្លត់ កាលវេលម៉ោង ១១និង១៥នាទីយប់ថ្ងៃទី១៤ ខែមករា ឆ្នាំ២០១៩ នៅតាមបណ្ដោយផ្លូវវេងស្រេងទល់មុខផ្សារ កាណាឌីយ៉ា ដែលស្ថិតនៅភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
រថយន្តដែលឆេះ ម៉ាក នីសាន់ក្រុមហ៊ុន រាជសីហ៍ ឡូជីស្ទីក ពណ៌សលៀយពណ៌ ត្រួយចេ ពាក់ស្លាកលេខ ព្រះសីហនុ 3A-0103 បើកបរក្នុងទិសដៅពីលិចទៅកើត។
តាមប្រភពព័ត៌មានពីប្រជាពលរដ្ឋ នៅកន្លែងកើត បានឲ្យដឹងថានៅមុនពេលកើតហេតុ គេឃើញរថយន្ត យីឌុបមួយគ្រឿងខាងលើ បើកបរយ៉ាងលឿន ក្នុងទិសដៅពីលិចទៅកើត លុះបើកមកចំណុចកើតហេតុខាងលើ ស្រាប់តែរថយន្តខាងលើ បានដាច់កង់ក្រោយផ្នែកខាងឆ្វេង បណ្តាលឲ្យថាសរថយន្ត អូសជាមួយថ្នល់ បែកផ្កាភ្លើងឆេះ ហើយរថយន្តទៅមុខលែងរួច។
ប្រភពដដែល បន្តទៀតថា ករណីនេះ ត្រូវបានប្រជាពលរដ្ឋដែលធ្វើដំណើរ និងប្រជាពលរដ្ឋក្នុងមូលដ្ឋាន ព្រមទាំងសមត្ថកិច្ច បានយកទឹក និងបំពង់ពន្លត់អគ្គិភ័យ មកជួយពន្លត់ភ្លាមៗផងដែរ។
ក្រោយពេលកើតហេតុ រថយន្តបង្កខាងលើ ត្រូវបានតៃកុងហៅរថយន្តមួយគ្រឿងទៀត មកសាង ដើម្បីលក់នៅផ្សារបន្ត៕
