ភ្នំពេញៈ ក្រុមជនសង្ស័យប្រុសស្រី ៤នាក់ ធ្វើសកម្មភាពវាយប្លន់យកទូរស័ព្ទ ពីជនជាតិបរទេសម្នាក់ កំពុងជិះកង់បានសម្រេច តែត្រូវជនជាតិបរទេស វាយដណ្ដើមយកបានមកវិញ រួចក្រុមជនសង្ស័យក៏រត់គេចខ្លួនបាត់។
ហេតុការណ៍នេះ កើតទ្បើងកាលពីវេលាម៉ោង ១ និង១០នាទីរំលងអធ្រាតឈានចូលថ្ងៃទី២៧ ខែមិនា ឆ្នាំ២០១៩ តាមបណ្ដោយផ្លូវសុធារស ក្នុងសង្កាត់ជ័យជំនះ ខណ្ឌដូនពេញ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេឃើញជនបរទេសម្នាក់ កំពុងជិះកង់សុខៗ ស្រាប់លេចជនសង្ស័យខាងលើ ជិះម៉ូតូមួយគ្រឿង មិនចាំម៉ាក និងពីរនាក់ទៀត ដើរស្មើរជើង មកស្ទាក់ធ្វើសកម្មភាព យកដំបងវាយប្លន់យកទូរស័ព្ទពីជនជាតិបរទេសខាងលើ បានសម្រេចតែត្រូវជនជាតិបរទេសតដៃវិញ ដោយដកច្រវ៉ាក់ ដែលចាក់ជាប់និងកង់ មកវាយក្រុមជនសង្ស័យដណ្ដើមយកទូរស័ព្ទបានមកវិញ ដោយឃើញសភាពមិនស្រួលជនសង្ស័យទាំងនោះ ក៏បាន រត់គេចខ្លួនពីកន្លែងកើតហេតុ។
ក្រោយកើតហេតុជនបរទេសរូបនោះ ទៅដាក់ពាក្យបណ្ដឹងនៅប៉ុស្តិ៍ជ័យជំនះ ដើម្បីធ្វើការស្រាវជ្រាវ ចាប់ជនសង្ស័យទាំងនោះ មកផ្ដន្ទាទោសតាមផ្លូវច្បាប់៕
