សៀមរាបៈ កាលពីវេលាម៉ោង ១៦និង០៥នាទីថ្ងៃទី២៩ ខែធ្នូ ឆ្នាំ២០១៩ កម្លាំងនគរបាលការិយាល័យស៊ើបអង្កេត និងអនុវត្តនីតិវិធី នៃស្នងការដ្ឋាននគរបាលខេត្តសៀមរាប បានទទួលជនបរទេស ០២នាក់ ពីនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍។

នគរបាលអន្តោប្រវេសន្ត បានឲ្យដឹងថា ជនបរទេសទាំង ០២នាក់នេះ មាន ១-ឈ្មោះ LIU FENG ភេទប្រុស អាយុ ៣៨ឆ្នាំ ជនជាតិ ចិន ពាក់ព័ន្ធនឹងករណីអំពើលួច មានស្ថានទម្ងន់ទោស (យកទ្រព្យសម្បត្តិ-ប្រើហិង្សា) ប្រព្រឹត្តិកាលពីថ្ងៃទី២៤ ខែធ្នូ ឆ្នាំ២០១៩ នៅចំណុចផ្ទះជួល ភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប និង២-ឈ្មោះ RAMIREZ ANGELITA SALVADOR ភេទស្រី អាយុ ៤៨ឆ្នាំ ជនជាតិ ហ្វីលីពីន ពាក់ព័ន្ធនឹងករណីឆបោកប្រាក់ ប្រព្រឹត្តិកាលពីថ្ងៃទី១៨ ខែតុលា ឆ្នាំ២០១៩ នៅចំណុចផ្ទះជួល ភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។

បច្ចុប្បន្នជនបរទេសទាំង ០២នាក់នេះ ត្រូវបានលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប សម្រេចឲ្យឃាត់ខ្លួនបណ្តោះអាសន្ន នៅស្នងការដ្ឋាននគរបាលខេត្តសៀមរាប ដើម្បីបន្តការសាកសួរ និងរៀបចំកសាងសំណុំរឿង បញ្ជូនទៅសាលាដំបូងខេត្ត ចាត់ការបន្តតាមនីតិវិធី៕