ភ្នំពេញៈ កាលពីវេលាម៉ោង ៤ និង ៣០ នាទីទៀបភ្លឺ ឈានចូលថ្ងៃទី៧ ខែកុម្ភៈ ឆ្នាំ ២០២០ ស្ថិតតាមបណ្ដោយផ្លូវ ១០៨ កែងនឹងផ្លូវព្រះនរោត្តម ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ មានករណីយុវជនម្នាក់ ជិះម៉ូតូឆ្លងផ្លូវ មិនប្រយ័ត្ន ត្រូវរថយន្តមិនចាំម៉ាកបុកស្លាប់ ។

ជនរងគ្រោះឈ្មោះ ង៉េង ប៊ុនឆៃ ភេទប្រុស អាយុ ១៨ ឆ្នាំ មុខរបរ បុគ្គលិកក្នុងហាងមួយកន្លែង ស្នាក់នៅផ្ទះ២៨E0 ផ្លូវ១០៨ ភូមិ៥ សង្កាត់វត្តភ្នំ ខណ្ឌដូនពេញ រាជធានីភ្នំពេញ មានស្រុកកំណើតនៅឯខេត្តព្រៃវែង។

ដំណើររឿង៖ មុនកើតហេតុ គេឃើញបុរសម្នាក់ ជិះម៉ូតូហុងដាប៊ីត ពណ៌ ខៀវ ស ពាក់ផ្លាកលេខ ភ្នំពេញ 1IB-9990 ធ្វើដំណើរតាមបណ្ដោយផ្លូវ ១០៨ ពីលិចទៅកើត មកដល់ចំណុចកើតហេតុ ស្រាប់តែមានរថយន្ត មិនចាំម៉ាក ១គ្រឿង បើកយ៉ាងលឿន ក្នុងទិសដៅពីត្បូងទៅជើង ទៅបុកពេញទំហឹង បណ្ដាលឲ្យអ្នកបើកម៉ូតូ ខ្ទាតបោកក្បាលនឹងខឿនថ្នល់ ក្បែរស្ពាននាគ បែកក្បាលស្លាប់មួយរំពេច។ ភ្លាមៗនោះ រថយន្តបង្ក បានបន្ថែមល្បឿន ព្យាយាមបើកគេចខ្លួនបាត់តែម្ដង។

ក្រោយកើតហេតុ សមត្ថកិច្ចមូលដ្ឋាន បានមកដល់ ទាក់ទងទៅជំនាញ ឲ្យចុះវាស់វែង យកម៉ូតូទៅរក្សាទុក រង់ចាំដោះស្រាយតាមច្បាប់។ ចំណែកសព ប្រគល់ជូនសាច់ញាតិ យកទៅធ្វើបុណ្យតាមប្រពៃណី នៅស្រុកកំណើត៕