រតនគិរីៈ យ៉ាងហោចណាស់មនុស្សប្រុសស្រី៦នាក់ បានរងរបួសធ្ងន់ស្រាលក្នុងករណីគ្រោះថ្នាក់ចរាចរណ៍ ខណៈកំពុងបើករថយន្តលឿនដូចហោះ ក៏រេចង្កូតធ្លាក់ផ្លូវក្រឡាបជាច្រើនត្រឡប់ផ្ងារជើងឡើងលើ។ ហេតុការណ៍នេះ កើតឡើងនៅវេលាម៉ោង១១៖៥០នាទី ថ្ងៃត្រង់ ថ្ងៃទី២ ខែសីហា ឆ្នាំ២០១៦នេះ នៅតាមបណ្តោយផ្លូវជាតិលេខ៧៦ ត្រង់ចំណុចភូមិស្រែឈូក ឃុំជ័យឧត្តម ស្រុកលំផាត់ ខេត្តរតនគិរី។

មន្ត្រីអាវុធហត្ថស្រុកលំផាត់ ឲ្យដឹងថា រថយន្តម៉ាក តូយូតាកាមរី ពណ៌ខ្មៅ ពាក់ស្លាកលេខភ្នំពេញ ២D-៣៦២០ មួយគ្រឿង ដែលបើកបរក្នុងទិសដៅពីត្បូងទៅជើងក្នុងល្បឿនយ៉ាងលឿន មកដល់ត្រង់ចំណុចកើតហេតុខាងលើ ក៏រេចង្កូតធ្លាក់ផ្លូវតែម្តង បណ្ដាលឲ្យមនុស្សចំនួន៦នាក់ ក្នុងនោះ មានស្រី៣នាក់ ប្រុស៣នាក់ រួមទាំងក្មេងប្រុសម្នាក់ផងដែរ ត្រូវរងរបួសធ្ងន់ស្រាល។

ប្រភពបន្តឲ្យដឹងថា អ្នកបើកបរមានឈ្មោះ ញេន តៃយ៉ា ភេទប្រុស អាយុ២៥ឆ្នាំ (របួសស្រាល) មានមុខរបរកសិករ មានទីលំនៅក្នុងភូមិគោកក្រសាំង ឃុំគោកគូង ស្រុកកញ្ជ្រៀច ខេត្តព្រៃវែង ចំណែកឯជនរងគ្រោះ៥នាក់ទៀត មិនត្រូវបានស្គាល់អត្តសញ្ញណនោះទេ។ ភ្លាមៗ ក្រោយពេលកើតហេតុ រថយន្តសង្គ្រោះក៏ដឹកបញ្ជូនជនរងគ្រោះទាំង៦នាក់ ទៅកាន់មន្ទីរពេទ្យបង្អែកខេត្ត ដើម្បីជួយសង្គ្រោះបន្ទាន់៕