ភ្នំពេញ: ហាងលក់ទូស័ព្ទ លឹមហាវ ទើបបើកថ្មី ត្រូវជនសង្ស័យប្លន់ទូរស័ព្ទ ចំនួន៧គ្រឿង សរុបតម្លៃជាង៣០០០$ (បីពាន់ដុល្លា) រត់ចោលម៉ូតូ ម៉ាក wave ចាស់ស្លាកលេខ កណ្តាល 1G-5094 គេចខ្លួនចូលផ្សារនាគមាស ត្រូវបានកម្លាំងព្រហ្មទណ្ឌ ខណ្ឌទួលគោកឡោមព័ទ្ធ ជាង២ម៉ោងនៅ មិនទាន់រកឃើញ ។

ហេតុការប្លន់ទូរស័ព្ទនេះ កើតឡើងនៅហាងលក់ទូរស័ព្ទ លឹមហាវ ផ្ទះលេខ៧៨E012 ផ្លូវ២៣០ កែងផ្លូវ២២៣ សង្កាត់ផ្សារដើមគរ ខណ្ឌទួលគោក រាជធានីភ្នំពេញ កាលពីម៉ោង១៣:០៥នាទី ថ្ងៃទី១៨ ខែសីហា ឆ្នាំ២០១៦នេះ ។

អ្នកលក់ក្នុងហាងលក់ទូរស័ព្ទ លឹមហាវ បានប្រាប់ឲ្យដឹងថា ជនសង្ស័យចូល មកប្លន់ទូរស័ព្ទ អស់ចំនួន៧គ្រឿង ជិះម៉ូតូមកតែម្នាក់ឯង និងធ្លាប់មកម្តងរួច ហើយកាលពីថ្ងៃមុនមិនចាំ ។

ប្រភពបន្តទៀតថា ជនសង្ស័យមានរាង្គស្គមស្តើង កំពស់ប្រហែល១,៦២ម៉ែត្រ សម្បុរសណ្តែកបាយ អាយុប្រហែល៣២ឆ្នាំ ពាក់អាវសាច់ក្រណាត់ ពណ៌លឿងដៃវែង ស្ពាយកាបូបចំហៀង ពណ៌សុកូឡា មានអាវុធខ្លី ម៉ាករ៉ូឡូ ចាស់តូច ដោយពីដំបូងឡើយ ជនសង្ស័យមកទិញ ទូរស័ព្ទដើម្បីយក ទៅលក់បន្ត នៅខេត្តសៀមរាប ដោយបានកត់ត្រា តម្លៃទូរស័ព្ទនីមួយៗ និងតថ្លៃត្រឹមត្រូវអស់រយៈ ពេលជិត២ម៉ោង រហូតដល់អស់មនុស្ស នៅខាងមុខហាងទើបយកដៃលូកយកកាំភ្លើងខ្លី ក្នុងកាបូបស្ពាន មកភ្ជង់ប្រមូលទូរស័ព្ទ ដែលច្រកក្នុងថង់ចំនួន៥គ្រឿង រួចក៏ភ្ជង់បញ្ជាឲ្យ ហ៊ុចទូរស័ព្ទចំនួន២គ្រឿងទៀត ។

សរុបទាំងអស់ចំនួន៧គ្រឿង ដែលមានតម្លៃជាង៣០០០$ (បីពាន់ដុល្លារ) ហើយទូរស័ព្ទ ដែលបាត់នោះរួមមាន ១. Iphone 6S Plus ចំនួន៣គ្រឿង ២.Iphone 5 ចំនួន២គ្រឿង ៣. Samsung Galaxy 6 edge ចំនួន២គ្រឿង គឺសុទ្ធតែថ្មីទាំងអស់ លើកលែងតែ Iphone 5 ដែលជាទូរស័ព្ទ១ទឹក ។

នរគបាលបានប្រាប់ថា ជនសង្ស័យពេលធ្វើសកម្មភាព ហើយក៏ចាកចេញ មកក្រៅឡើង ជិះម៉ូតូក៏ប្រទះឃើញ នរគបាល ព្រហ្មទណ្ឌខណ្ឌទួលគោក មានការភិតភ័យក៏ផ្តួលម៉ូតូ និងដកកាំភ្លើងខ្លីភ្ជង់មកសមត្ថកិច្ច និងប្រជាពលរដ្ឋ រត់គេចខ្លួន ទាំងដោះស្បែកជើង សំដៅទៅផ្សារនាគមាស បាត់តែម្តង ។

គួរបញ្ជាក់ផងដែរថា រហូតមកដល់ពេលនេះ កម្លាំងព្រហ្មទណ្ឌ នៃអធិការដ្ឋាននរគបាល ខណ្ឌទួលគោកឡោមព័ទ្ធ ផ្សារនាគមាស និងផ្សារដើមគរព្រមទាំង លុកចូលឆែកឆេរ ក្នុងផ្សារតាមតូបតាមច្រក ដើម្បីប្រម៉ាញ់ជនសង្ស័យ និងបានសហការ ជាមួយកម្លាំងព្រហ្មទណ្ឌ នៃស្នងការដ្ឋានរាជធានីភ្នំពេញផងដែរ តែមកទល់នាពេលនេះ នៅមិនទាន់មានតំរ៉ុយ នៅឡើយទេ។

ប្រភពបានឲ្យដឹងថា ទោះបីកម្លាំងសមត្ថកិច្ច ច្រើនដូចស្រមោច ឡោមព័ទ្ធនិងរុករក ក្នុងផ្សារ នាគមាសយ៉ាងណាក៏ដោយ ជនល្មើស នៅតែគេចខ្លួនបានដោយសុវតិ្ថភាព។ នេះសរបញ្ចាក់ថា ជនល្មើសពិត ជាមានសមតិភាព គេចពីកម្លាំងសមត្ថិកិច្ចច្រើន ដូចស្រមោច បានយ៉ាងស្រូល៕