កំពតៈ នៅថ្ងៃចន្ទ ៤កើត ខែអស្សុជ ឆ្នាំឆ្លូវត្រីស័ក ពស ២៥៦៥ត្រូវថ្ងៃទី៨ ខែវិច្ឆិកា ឆ្នាំ២០២១ វេលាម៉ោង ៣និង២០នាទី មានករណីគ្រោះថ្នាក់ចរាចរណ៍កើតឡើងមួយករណី ត្រង់ចំណុចភូមិត្រពាំងរាំង ឃុំអង្គរមាស ស្រុកដងទង់ ខេត្តកំពត លើផ្លូវជាតិលេខ៣ ចន្លោះគីឡូម៉ែត្រលេខ ១១៩និង១២០ រវាងរថយន្តតូច និងរថយន្តធុនធំសណ្តោងរ៉ឺម៉ក ក្នុងទិសបញ្ច្រាសគ្នា។

១/-បង្កឡើងដោយ រថយន្តមធុនធំសណ្តោង ម៉ាក HYUNDAi ពណ៌ក្រហម ក្បាលពាក់ស្លាកភ្នំពេញ 3E-6157 និងសឺមីរ៉ឺកម៉កពាក់ស្លាកលេខ ភ្នំពេញ 4A -5750 ធ្វើដំណើរពីទិសខាងលិចទៅកើតផ្ទុះកង់មុខខាងស្តាំវេចង្កូតឆ្លងចូលទៅគន្លងផ្លូវខាងស្តាំរបស់រថយន្តបើកមកពីទិសបញ្ច្រាស ក្រោយពេលកើតហេតុអ្នកបើកបររត់គេចខ្លួនបាត់ បន្សល់វត្ថុតាងនៅកន្លែងកើតហេតុ។
២/-រថយន្តរងគ្រោះម៉ាក HYYUNDAi កូរ៉េ ១តោនកន្លះ ពណ៌ស ពាក់ស្លាកលេខ ភ្នំពេញ 2Y-6513 ធ្វើដំណើរពីកើតទៅលិច បើកបរដោយ ឈ្មោះ ភូ អ៊ុយ ភេទប្រុស អាយុ ៤៧ឆ្នាំ នៅភូមិបឹងនិមល ស្រុកទឹកឈូ ខេត្តកំពត រងរបួសធ្ងន់ និងអ្នករួមដំណើរមានឈ្មោះ ឈិន ចាន់ធា ភេទប្រុស អាយុ ៣៦ឆ្នាំ នៅភូមិព្រៃធំ ឃុំព្រៃធំ ស្រុកដំណាក់ចង្អើរ ខេត្តកែប របួសធ្ងន់ ទាំង ២នាក់ខាងលើ បានបញ្ជូនទៅមន្ទីរពេទ្យ។
ចំណែកវត្ថុតាងទាំងពីរ បានយករក្សាមករក្សាទុកនៅអធិការដ្ឋាននគរបាលស្រុកដងទង់ ជាបណ្តោះអាសន្ន៕