ការលក់ និងការផលិតរថយន្តនៅក្នុងប្រទេសចិន បានកើនឡើងយ៉ាងឆាប់រហ័សនៅក្នុងខែតុលា បើធៀបនឹងទៅឆ្នាំមុន។ នេះបើយោងតាមរបាយការណ៍បង្ហាញឲ្យដឹងនៅថ្ងៃចន្ទម្សិលមិញ។
ទីភ្នាក់ងារសារព័ត៌មានចិន ស៊ិនហួ បានចុះផ្សាយថា ការលក់រថយន្តបានកើនឡើង ២០,៣ភាគរយនៅក្នុងខែតុលា បើធៀបទៅនឹងឆ្នាំមុន ដោយមានចំនួន ១,៩៣លានគ្រឿង ដោយកើនឡើងពី ១៩,៧ភាគរយកាលពីខែកញ្ញា។ នេះបើយោងតាមសមាគមយានយន្តរបស់ចិនថ្លែងនៅក្នុងសេចក្ដីប្រកាស។
ចំណែកការផលិតរថយន្តវិញក៏បានកើនឡើង ២០,៧ភាគរយនៅក្នុងខែតុលា ដោយផលិតបានរថយន្តចំនួន ១,៩២លានគ្រឿង ដោយកើនឡើងយ៉ាងឆាប់រហ័សពីខែកញ្ញា។
នៅក្នុងរយៈពេល ១០ខែដំបូង ការលក់រថយន្តនៅក្នុងប្រទេសចិនបានកើនឡើង ១៣,៥ភាគរយ ដោយមានចំនួន ១៧,៨លានគ្រឿង ខណៈដែលការផលិតបានកើនឡើង ១៣,៦ភាគរយ ស្មើនឹង ១៧,៨លានគ្រឿង ដោយកើនឡើងខ្ពស់ជាងរយៈពេល ៩ខែដំបូង។
យោងតាមរបាយការណ៍បានបញ្ជាក់ឲ្យដឹងថា រថយន្តដែលក់ដាច់ជាងគេនៅក្នុងខែតុលា គឺជាប្រភេទរថយន្តដឹកអ្នកដំណើរ ហើយការនាំចេញនៅក្នុងខែតុលា ក៏បានកើនឡើង ៣,៣ភាគរយផងដែរ ចំណែកឯការនាំចេញសរុបក្នុងរយៈពេល ១០ខែដំបូងបានកើនឡើង ៧,៥ភាគរយ។
គួរបញ្ជាក់ផងដែរថា ចិនជាប្រទេសដែលមានទីផ្សាររថយន្តធំជាងគេ និងជាប្រទេសដែលផលិតរថយន្តធំជាងគេលំដាប់ទីបួនផងដែរ កាលពីឆ្នាំ២០១២៕