នៅពហុកីឡដ្ឋាន ETIHAD STADIUM កាលពីរាត្រីយប់មិញនេះដែរ ក្លិបមេឃខៀវបានទទួលភ្ញៀវ ក្លិបលំដាប់តារាងទី ១៧ ក្នុងក្របខណ្ឌ Premiker Legaue ដោយឈ្នះទាំងប្រផិតប្រផើយឡើងទៅកាន់តារាងទី ១ បណ្តោះអាសន្នខណៈដែល កាំភ្លើងធំមិនទាន់ប្រកួតជំនួបជើងទី ១៩ នោះ។
ក្លិបមេឃខៀវមិនខុសពីក្លិបបិសាចក្រហមប៉ុន្មានឡើយ កាលពីរាត្រីយប់មិញនេះដែរ ដោយឈ្នះ តែ ១ គ្រាប់តែប៉ុណ្ណោះ ពោលគឺលទ្ធផល ១-០ នៅនាទី ៦៦ ស្វែងរកគ្រាប់បាល់ដោយកីឡាករ Dzeko ។ បើទោះបីជាម្ចាស់ផ្ទះមែនពិត តែជួបក្លិបលំដាប់បាតតារាង មេឃខៀវហាក់ដូចជាយ៉ាប់ខ្លាំងណាស់ កាលពីរាត្រីយប់មិញនេះ ដោយទទួលការព្រមានវាយបកពីភ្ញៀវរហូត ដែលធ្វើឲ្យអ្នកចាំទីរបស់ខ្លួន របួសក្រោមភ្នែកផងដែរ ។គ្រាប់បាល់ ១ គ្រាប់របស់ Dzeko ដែលរកបាននោះគឺជាគ្រាប់បាល់ដែលប៉ះយ៉ាងស្អាតបំផុតរបស់ កីឡាករ David Silva ហើយ Dzeko ស៊ុតកាច់ចង្កេះយ៉ាងស្អាត នៅតំបន់ប្រអប់សំខាន់នោះ។
មួយគ្រាប់របស់ Dzeko បានធ្វើឲ្យ មេឃខៀវ ឡើងទៅគ្រប់គ្រងតារាងបណ្តោះអាសន្ន ដែលមាន ៤១ ពិន្ទុ ក្នុងចំណោម ១៩ ប្រកួត ខណៈដែល កាំភ្លើងធំ Arsenal មាន ៣៩ ពិន្ទុ ក្នុងចំណោម ១៨ ប្រកួត៕
