ចិន៖ មន្ត្រីគ្រប់គ្រងគ្រោះមហន្តរាយចិន បានប្រកាសឲ្យដឹងនៅព្រឹកថ្ងៃសៅរ៍នេះថា ចំនួនអ្នកស្លាប់ដោយសារលិចនាវានៅក្នុង Yangtze River បានកើនឡើងដល់ ៣៣១នាក់ និងបាត់ខ្លួន ១១១នាក់។
យោងតាមការចេញផ្សាយរបស់ទូរទស្សន៍ក្នុងស្រុកចិន CCTV បានឲ្យដឹងថា ក្រៅពីមនុស្ស ១៤នាក់ ដែលត្រូវបានជួយសង្គ្រោះភ្លាមៗនោះ ប្រហែលជាគ្មាន នរណាផ្សេងនៅរស់ឡើយ បើទោះបីជាព័ត៌មាននេះ ហាក់ដូចជាដាច់ក្ដីសង្ឃឹមរបស់សាច់ញាតិជនរងគ្រោះក្ដី ប៉ុន្តែគិតចាប់តាំងពីថ្ងៃលិច រហូតមកដល់ពេលនេះ មានរយៈពេលជិត១សប្ដាហ៍ ប៉ុន្តែពុំបានរកឃើញអ្នកនៅមានជីវិតឡើយ។
គួរបញ្ជាក់ផងដែរថា អាជ្ញាធរចិន បានឃុំខ្លួនបុរសជាអ្នកបើកបរនាវា បន្ទាប់ពីជួយសង្គ្រោះ បើទោះបីជានាវានោះលិចដោយសារខ្យល់ព្យុះក្ដី ប៉ុន្តែជាគោលការណ៍ត្រូវឃុំខ្លួនដើម្បីសួរនាំ និងធ្វើការស៊ើបអង្កេត៕