(ម៉ូស្គូ)៖ រុស្ស៉ីនៅថ្ងៃអង្គារ ទី២១ ខែកក្កដានេះ បានសម្ញែងគំរូយន្តហោះចម្បាំងបំបាំងកាយស៊េរីថ្មីចុងក្រោយបំផុតរបស់ខ្លួន ដែលត្រូវរចនាឡើងជាពិសេសទុកប្រជែងជាមួយ យន្តហោះចម្បាំង F-35 របស់សហរដ្ឋអាមេរិក។

យន្តហោះចម្បាំងថ្មីខាងលើដែលមានរហ័ស្សនាម Checkmate និងជាប្រភេទយន្ដហោះចម្បាំងក្នុងត្រកូល Sukhoi ត្រូវបានអភិវឌ្ឍរួមគ្នាដោយក្រុមហ៊ុន Rostec និងក្រុមហ៊ុន United Aircraft Corporation (UAC) របស់រុស្ស៉ី។ បើតាមក្រុមហ៊ុន Rostec យន្តហោះចម្បាំងជំនាន់ទី៥នេះ មានកៅអី១ ដែលបំពាក់នូវ បច្ចេកវិទ្យាទំនើបៗទាន់សម័យបំផុត ដូចជាបច្ចេកវិទ្យាបញ្ញាឆ្លាតវៃ (AI) និងបច្ចេកវិទ្យាបំបាំងកាយពីប្រព័ន្ធរ៉ាដា។

មិនតែប៉ុណ្ណោះ Checkmate ថែមទាំងមានសមត្ថភាពវាយប្រហារគោលដៅចំនួន៦ ក្នុងពេលតែមួយទៀតផង មិនថាគោលដៅនោះនៅលើដីគោក លើផ្ទៃសមុទ្រ ឬនៅលើផ្ទៃអាកាសនោះទេ៕

ប្រភព៖ AFP